Алабугада шимбә өмәсендә меңнән артык кеше катнашкан

Апрельнең беренче көненнән рәсми рәвештә шәһәр һәм районны ике айлык санитар чистарту башланды. Гадәттәгечә, урамнарны тәртипкә китерүгә хезмәт коллективлары җәлеп ителә.

1 апрельдә генә дә 78 куб метр чүп чыгарылган, бу эш атна башында да дәвам итте. Райбашкарма комитеты мәгълүматына караганда, шимбә өмәсендә меңнән артык кеше катнашкан.

− Без хезмәттәшләр белән бергәләп яз саен тирә-юньне чистартабыз, саф һавада рәхәтләнеп эшлибез, — ди Илсөяр Галиева.

Шулай да бар кешенең дә күңеле алай күтәренке түгел — кайбер оешмалар үзләренә беркетелгән урыннарны бөтенләй җыештырмады. Бу турыда шәһәр киңәшмәсендә райбашкарма комитеты җитәкчесенең инфраструктура үсеше буенча урынбасары Андрей Томилин хәбәр итте. Чүп бит анда үзеннән-үзе барлыкка килмәгән. 

Шәһәрдә һәм районда яшәүчеләргә тагын бер кат искәртәсе килә: урам һәм паркларда, гараж һәм бакчачылык ширкәтләрендә чүп-чар кешеләрнең җавапсызлыгы аркасында гына барлыкка килә. Бер-беребезгә һәм шәһәребезгә хөрмәт белән карыйк.