Алабугада Хәрби хәрәкәтләр ветераннары көнен билгеләп үттеләр

Алабугалылар һәм барлык россиялеләр өчен бу календарьдагы дата гына түгел. Бу — тере хәтер, ул әтиләрдән балаларга, ветераннардан — аларның эшен дәвам итүчеләргә тапшырыла.

Моннан тыш, бу көнне хәрби бурычларын үтәгәндә һәлак булган хәрбиләрнең туганнарына, ветераннарга, шулай ук тренировкаларда уңышлар күрсәткән яшь десантчыларга бүләкләр тапшырдылар. Бүләкләү тантанасы митингта һәм шәһәркүләм җитәкчеләр киңәшмәсендә үтте.

Үлгәннән соң бүләкләнгән геройларның туганнарына орден-медальләрне Алабуга районы башлыгы Рөстәм Нуриев Россия Федерациясе Президенты Указлары нигезендә тапшырды.

Батырлык орденына лаек булдылар:

• Маев Павел (бүләкне аның абыйсы Юрий Маев алды), 
• Романов Сергей (бүләкне хатыны Сабина Романова кабул итте).
• Минабутдинов Руслан (бүләкне аның апасы Лилия Таҗетдинова алды).
• Мамедов Әмин (бүләкне аның әтисе Саявуш Мамедов кабул итте).

II дәрәҗә «Батырлык өчен» медальләренә лаек булдылар:

• Никитин Александр (бүләкне аның әнисе Надежда Никитина һәм кызы Ангелина алды).
• Довгаль Евгений Юрьевич (бүләкне улы Кириллга тапшырдылар).

Тантаналы митингта Алабуга районы башкарма комитеты җитәкчесенең социаль үсеш буенча урынбасары Елена Мерзон җитәкчелек, шәһәр һәм район халкы исеменнән якташ геройларга батырлыклары өчен рәхмәт белдерде, чөнки алар ярдәмендә без бөек илебездә яши һәм эшли алабыз.

«Сез катлаулы язмышны сайладыгыз һәм кайнар нокталарда Ватанга намус белән хезмәт иттегез, — дип билгеләп үтте ул. — Ватан чикләреннән кайткач, сез чын патриот исемен йөртүегезне, яшь буын белән эшләвегезне дәвам итәсез. Моның өчен сезгә бик зур рәхмәт! Сезнең өчен борчылып яшәгән туганнарыгызга һәм якыннарыгызга чиксез рәхмәт. Кайтмаган батырларга — мәңгелек дан».

Алабуга шәһәре һәм Алабуга районы хәрби комиссары Николай Битюков ассызыклаганча, 1 июль — Россия өчен сугышкан һәркемне искә алу көне, бүген без хәрби хәрәкәтләр ветераннарына рәхмәт әйтәбез, арада булмаганнарны тирән хөрмәт белән искә алабыз.

АМР ветераннар советы рәисе урынбасары Павел Карманов сөйләвенчә, алгы сызыкта булырга туры килмәсә дә, аңа өйләренә кайтарыла торган йөзләгән һәлак булган сугышчыны кабул итәргә туры килгән. «Һәлак булган сугышчының якыннарына кайгылы хәбәрләр җиткерү, чыннан да, бик авыр иде. Ләкин бу минем өскә салынган бурыч булды», — дип өстәде ул.

Алабуга ветераннары һәм сугыш хәрәкәтләрендә катнашучылар советы рәисе Михаил Семенов җыелучыларны котлады һәм аларга ныклы сәламәтлек, иминлек, тыныч күк йөзе теләде.

Хәрби хәрәкәтләр ветераннары: Әфганстандагы сугышта, Әмин сараен алуда катнашкан Альберт Максимов, Төньяк Кавказдагы террорчылыкка каршы операциядә катнашкан Алексей Пухов, махсус хәрби операция катнашучысы Евгений Маршалко һәм Андрей Че, һава-десант гаскәрләре ветераны Айрат Нәҗмиев АМР башлыгының рәхмәт хатларын алдылар.

«Сугышчан хәрәкәтләр ветераны» медале белән МХО катнашучылары Александр Николаев һәм Руслан Заитов бүләкләнде. Моннан тыш, ветераннар эшендә һәм хәрби операциядәгеләргә гуманитар ярдәм күрсәтүдә актив катнашучыларга Алабуга ветераннары һәм хәрби хәрәкәт ветераннары советларының рәхмәт хатлары тапшырылды.

«Разведка» балалар-яшүсмерләр хәрби-спорт әзерлеге үзәге һәм «Яшь десантник» клубы тәрбияләнүчеләре өчен бу көн аеруча үзенчәлекле булды. Егетләр һәм кызлар зәңгәр берет киеп йөрү хокукына таныклык һәм тимер юл гаскәрләренең 43 нче аерым бригадасы командирының рәхмәт хатларын алдылар. Эдгар Холуев яшьләр белән эшләгән өчен «Александр Невский. Патриотик тәрбия өчен» медале белән бүләкләнде.

«Университет» мәктәбенең 8 сыйныф укучысы Дарья Шарпова тормышын хәрби эш белән бәйләргә карар кылуы турында сөйләде: «Хәзер минем өчен иң яхшы үрнәк — минем инструкторларым. Биредә басып торуыбыз һәм бүләкләр алуыбыз хакына гомерләрен аямыйча сугышкан геройларга рәхмәт әйтәсем килә».

Рәсми өлеш тәмамланганнан соң, тантанада катнашучылар «Барс» яшьләр үзәгендә «Герой әтисе. Герой әнисе» күргәзмәләре белән танышты. 2 нче мәктәпнең 9 нчы сыйныф укучысы Константин Данилов әнисе һәм һәлак булган абыйсының портреты белән фотога төште. Әйтүенчә, егет армиядә хезмәт итәргә җыена. «Мине хәрби әзерлек һәм кул сугышы кызыксындырды. Бу көн минем өчен туганнарым һәм якыннарым истәлеге буларак мөһим, ә бүләкләр — зур хөрмәт һәм шатлык».

Ветеран Рәис Тайзатдинов фотоларның берсендә хезмәттәшен танып алды: «Без Украинаның Артемовск шәһәрендә бер подразделениедә бергә сугыштык. Бик шәп малай иде — шат күңелле, куркусыз. Геройларча һәлак булды. Күргәзмә шәп. Якташларны искә алуыгыз һәм кешеләргә сөйләвегез өчен рәхмәт. Бу егетләр — безнең горурлыгыбыз».

Андрей Че билгеләп үткәнчә: «Күргәзмә ике төрле тәэсир калдыра: беренчедән — югалту ачысы, чөнки сугышчан иптәшләрне күп тапкырлар югалтырга туры килде, икенче хис — рәхмәт хисе. Әле күптән түгел генә бер сугышчыны җирләгәндә аның әнисе: «Рәхмәт сиңа, улым, син Ватаныбызны саклап һәлак булдың. Сугышларда катнашып, Бөек Җиңү яулаган нәселебезне хур итмәдең», — дип әйткән сүзләре хәтеремә уелып калды. Бу сүзләрнең төсмерен мин монда да күрәм. Мондый балаларны тәрбияләү өчен гаиләнең дә дөрес булуы кирәк».