Алабуга нуры

Алабугалылар авыл хуҗалыгы ярминкәләрендә нәрсә сатып ала

Ит, киптерелгән җиләк-җимеш, сыр, казылык — бу һәм башка әйберләрне һәр шимбә уза торган авыл хуҗалыгы ярминкәләрдә сатып алырга була.

Исегезгә төшерәбез, ярминкә традиция буенча «Мираж» сәүдә үзәге янында һәм иске базар территориясендә уза. Анда алабугалыларга нәрсәләр тәкъдим итүләрен күрер өчен, без 4нче микрорайонда узган ярминкәгә юнәлдек.

Керү янында ук — сыер һәм дуңгыз ите, алардан ерак түгел — каз, үрдәк, бройлерлар сатыла. Бәяләре төрлечә.

— Кош-кортны үз хуҗалыгымда үстерәм. Ел саен шәһәр халкының Яңа ел өстәлендә каз була. Алар казсыз калмасын өчен 40ка якын каз һәм 30 үрдәк сатып алабыз. Шулай ук бездә каз мае һәм аның эчке органнары да бар. Күпчелек кеше аларны яраткан татар ризыгы — бәлеш пешерү өчен файдалана, — ди Хәмдия Глухова.

Аннан ерак түгел төрле җиләк-җимеш: сырганак, караҗиләк, нарат җиләге, мүк җиләге, кара миләш саталар. Аларны Анзиркадан алып килгәннәр. Шулай ук Морт авылыннан алып килгән берничә төрле бал да бар. Ренат Хисаметдинов умартачылык белән балачактан ук шөгыльләнә. Хәзер аның 60ка якын умартасы бар.

— Быел бал күп, шуңа күрә сәүдә алай яхшы бармый. Ярминкәләрдә бер тоннага якын гына бал саттым, − ди ул.

Балдан тыш, умартачы шулай ук балавыз көясеннән ясалган катнашма (аны үпкә авыруларыннан дәвалану өчен кулланалар), балавыз, бал икмәге һәм башка умартачылык продуктларын сата. Кыскасы, ярминкәдә товарлар күп төрле, һәр кеше үзенә теләгәнне таба ала. Ә алабугалылар нәрсә сатып ала икән?

Зөһрә Хөсәенова:

— Без авылдан китерелгән сөт продуктларын сатып алдык. Узган ел чикләвек алган идек. Һәм, әлбәттә, һәрвакытта да ит алабыз. Продукциянең сыйфаты бик яхшы.

Һадиевлар гаиләсе:

− Без бүген нарат җиләге, мүк җиләге, карлыган сатып алдык. Алардан компот та ясарга була. Ысланган ат ите, мунча себеркеләре алдык.

Ирина Иванова:

— Ике тапкыр имән себеркеләре сатып алдым, миңа бик ошады. Моннан тыш һәрвакыт сөт продуктлары алам. Мин каймакны бер хатын-кыздан сатып ала идем, әмма аның инде продукциясе беткән, шуңа күрә башка сатучыны эзлим. Ит продукциясен дә алам. Ярминкәләр үткәрү бик кирәк. Бөтен кирәкле әйбернең дә бер урында сатылуы бик уңайлы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: