Алабуга нуры

Алабугалылар Әстерханда Сабантуй үткәрде

Узган шимбәдә алабугалылар әстерханлылар өчен матур һәм күңелле Сабан туе ясады.

Пәнҗешәмбедә артистлар автобус белән кояшлы Әстерхан ягына юл тотты.

− Делегация составында — «Шатлык нуры» ансамбле, «Алабуга» җыр һәм бию ансамбле, Алабуга мәдәният һәм сәнгать көллияте җырчылары. Татарстанның бөтен матурлыгын күрсәтеп милли бәйрәмне югары дәрәҗәдә уздырырбыз дип өметләнәм, − диде Мәгариф идарәсе башлыгы Юлия Шәкурова.

Шулай килеп чыкты да — бәйрәм онытылмаслык булды, чөнки тырышып әзерләнгәннәр, Алабуга артистлары безнең шәһәребезне генә түгел, республикабызны да танытты.

Әстерхандагы милли бәйрәм өч мәйданда оештырылды, һәммәсендә күңел ачу уеннары, дөяләр чабышы үтте. Эпидемиологик вәзгыять аркасында, Сабантуй чикләнүләр белән узды, әмма тамашачылар моңа бер дә хафаланмады, чыгышлар, уеннар, сыйлар белән ләззәтләнде.

Алабугалыларга бәйрәм ясау өчен Дуслык йортын ышанып тапшырдылар, безнекеләр иҗади программа тәкъдим итте һәм бәйрәмне алып баручылар булды. Үзләре белән декоратив кулланма сәнгать эшләнмәләре алып бардылар, Сабан туе кунакларын чәк-чәк белән сыйладылар.

− Безнең төбәктә бу иң яраткан бәйрәмнәрнең берсе. Бүген мин Васыйл Габделгаяз (ТР Премьер-министр урынбасары Васыйл Шәйхразиев — Авт. иск.) Сабантуй инде күптән милли чикләреннән чыгып, тынычлык, дуслык, яхшы күршелек төшенчәләрен якын итүчеләрнең барысының да яраткан бәйрәменә әверелде. Күпмилләтле төбәгебездә без бар күршеләр белән дә дус яши белүебезне күрсәттек инде. Сабан туе — якты киләчәккә ышаныч ул, − диде Архангельск өлкәсе губернаторы Игорь Бабушкин Сабан туеның төп сәхнәсеннән.

Бөтендөнья татар конгрессының Милли Шура рәисе Васыйл Шәйхразиев билгеләп үткәнчә, пандемия аркасында былтыр Сабан туен онлайн үткәрергә туры килде.

− Быел бу бәйрәмне үткәрү мөмкинлеге бар, һәм сез, беренчеләрдән булып, безнең зур бердәм Россия территориясендә Сабан туен башлыйсыз. Ул бүген алты төбәктә уза. Сабантуй — татар халкының гына бәйрәме түгел, ул − уртак. Анда хәзер төрле милләт кешеләре теләп катнаша, аралаша, охшаш йолалар таба, — диде ул һәм ТР Президенты Рөстәм Миңнехановтан Игорь Бабушкинга сәламләү адресы тапшырды.

Янып торган кояш һәм 30 градустан да арткан эсселеккә карамастан, бу көнне бәйрәмне күрергә дип төрле милләт кешеләре җыелды. Хәлил Баубәков тамашалар башлануга бер сәгать кала килде. Дуслары белән бергә ул бер Сабан туен да калдырмый икән. Бөтенесе бергә күңел ачалар, бер-берсен милли ашлар белән сыйлыйлар. 

− Бүген әле барысы да килеп җитмәде, без бит өлкән яшьтә инде. Кырым һәм Казан татарлары белән бәйләнешне өзмәскә тырышабыз, телевизордан татарча тапшырулар карыйбыз, − диде ул.

Хәлил Баубеков белән килүчеләрнең барысына да чабышлар һәм концерт аеруча ошый. Татар көйләре бу көнне һәркемне җәлеп итте, татарча аңламаучылар да тыңлады, күбесе биюләргә дә кушылды.


Алабуга районы башлыгының урынбасары Олег Колпаков әстерханлылар өчен үзенчәлекле бүләк әзерләгән. Ул бәйрәмнең төп сәхнәсендә татарча җырлады. Һәм бу тамашачыларга шулкадәр ошады, аның башкаруын тагын сорадылар. 

− Үткән елдан алдагысында стадионда булган идек, безнең шәһәр вәкилләре дә анда чыгыш ясадылар. Быел бирегә эләгә алуыбызга шатбыз. Безнең өчен бу чын бәйрәм, ул безгә бик якын. Аны оештыручыларга һәм чыгышлар белән Татарстаннан килгән кунакларга рәхмәтлебез. Монда алган кичерешләр һәм күңел күтәренкелеге безгә ел буена җитәчәк, − дип фикерләрен уртаклашты Гайшә Җәлмөхәммәтова.

− Миңа сезнең артистларның чыгышы, ничек биюләре, җырлаулары бик ошады. Татар телен, аның яңгырашын яратам. Миңа Татарстан, Казан ошый, мин анда берничә тапкыр булдым инде, − ди Эльмира Шамгунова.
Гомумән, тамашачылар Алабугадан килүчеләрне җылы каршылады. Һәр чыгышны озаклап, «Афәрин!» дип алкышладылар, әстерханлылар теге яки бу артистның чыгышы турында фикерләрен бүлеште. Алар алабугалылар киләсе елда да килер дигән өмет белдерде. 

Әйтергә кирәк, бу баруда шәһәребез делегациясе җирле халык өчен бәйрәм оештырып кына калмады, бу көннәрдә Әстерханда узган татар киносы фестиваленең кунаклары да булды. 

Әстерхан өлкәсенең Иске Күчәргән авылында «Әпипә» комедияле фильмын күрсәттеләр. 

«Татаркино» директоры Миләүшә Айтуганова әйтүенчә, кино күрсәтү урынының монда сайлануы бер дә очраклы түгел. Бу торак пунктында татарлар күп яши, алар татар кинематографы белән танышуга шат булыр.
− Бүген ватандашларым белән аралаша алуыма һәм сезгә татар телендә кино тәкъдим итә алуыма, мин бәхетле. Шушындый очрашулар матур йолага әверелер дип өметләнәм, − диде ул.

Биредә яшәүчеләр дә Әстерханда алабугалыларның Сабантуй үткәрүе матур йолага әйләнер дигән өмет белдерде. Алар бәйрәм өчен рәхмәт әйтеп, киләсе елга да чакырды.

Безнең шәһәрнең моңа кадәр дә бәйрәм оештыручылар арасында булганы бар инде. Үз вакытында Сабан туен Санкт-Петербургта, Березовскида, Калининградта үткәрделәр.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: