Августның кыйммәтле сөенечләре

Алабугада быел 1100 бала беренче сыйныфка укырга керә. Өченче мәктәпкә барырга җыенучы Дамир Багданов - аларның берсе. Әти-әнисе аңа мәктәпкә костюм-чалбар алырга әлегә ашыкмый. Полина Багданова әйтүенчә, 1 сентябрьга кадәр әле вакыт бар, бала да буйга үсәргә мөмкин. Шулай булса да, кайбер әйберләрне: букча һәм спорт киемен алырга өлгергәннәр. Болар аларга 6 меңгә төшкән.

- Букчаны сайлаганда, кыйммәт булса да, ортопедлар таләбенә туры килгәненә тукталдык, минемчә ул улым өчен уңайлырак. Мәктәп киемнәре алганда, сыйфатка игътибар бирергә җыенам, чөнки әле алар кечкенә, әйбернең кадерен белеп кими, шуңа күрә бәясенә күзне йомып, озакка җитәрлек яхшысын алырга кирәк. Арзанлыны алып, ул тузгач, икенчене алганда, акча күбрәк тә чыга әле.

Полина Дамирны беренче сыйныфка әзерләү, ким дигәндә, 15 меңгә төшәр дип уйлый.

Базар һәм кибетләрдә якынча бәяләрне белештек, аларны сезгә тәкъдим итәбез:

Болардан тыш, әле канцтоварлар һәм Белем бәйрәменә чәчәк бәйләме дә кирәк. Барлык кирәк-яракны җыеп исәпләгәндә, барысы 1500 сумга төшә. Ә чәчәк бәйләме инде һәркемнең үз иркендә. Сатучылар әйтүенчә, бер розадан торган букет - 100 сум, купшы букетны 2 мең сумга алырга була.

Укучы киеменең төрен мәктәп әти-әниләр белән бергә сайлый - ул тиешле таләпләргә җавап бирерлек булсын. Шулай ук портфель сайлаганда, беренче чиратта, аның матурлыгына түгел, ә баланың сәламәтлегенә зыян салмый торган һәм уңайлы булуына игътибар итәргә кирәк.

Рания Шәймуллина, кибетче:

- Мин җиңел, мәсәлән 800 грамм авырлыктагы букчалар яклы. Бер килограммнан артык авырлыктагы сумкалар беренче сыйныф баласы өчен авыр, минемчә. "Гризли" фирмасы рюкзаклары иң ышанычлысы һәм яхшысы дип уйлыйм. Аларга берни булмый, минем балаларныкы шундый. Әлеге сумкаларның замогы да ватылмый, эчке материалы да нык, бер ялгансыз, бала мәктәпне шул бер букча белән бетерә ала. Гади сумкаларны да начар димим. Сумка сатып алганда, замокның эшләвен, тоткычы астында эчке якта запас тукыма барлыгын тикшерергә, теккән җирләре булырга, сумканың төбе нык, каешлары яхшы беркетелгән һәм озын булырга тиеш, чөнки кышкы куртка кигәндә, озынайтырга кирәк. Букчаның артка өлеше йомшак булырга тиеш, "ортопедик" дигәннәргә игътибарны нык җәлеп итмәскә, чөнки хәзер балалар мәктәпкә 3-10 километр җәяү йөрмиләр, мәктәпләр бик якын урнашкан, юлга 5-10 минутлап вакыты үтә инде баланың.

Шәһәребездә мәктәпкә киемне заказ белән тектерүчеләр дә бар. Ательеда эшләүчеләр сүзенә караганда, тегүнең үз уңай яклары бар, һәркем үзе теләгәнчә тектерә. Кемгәдер "кояш" итәк кирәк, алъяпкычның "канатлары" кабарынкырак кирәк. Сатып алганда, сиңа ошаганының размеры туры килмәскә мөмкин. Димәк, нәтиҗәдә заказ бирүче үз размерындагы үзе теләгән киемне килеп ала, чагыштырмача бәясе шул ук. Кибеттән алсаң да, заказ биреп тектерсәң дә, аерма әлләни сизелми. Алъяпкычны якынча 400 сумга, күлмәкне 800-1000 сумга тегәләр, бәя фасонга карап. Ә менә беренче сыйныфка баручы малайларга костюм-чалбарны сатып алу кулайрак, чөнки тектерү кыйммәткә төшә. Тегүчеләр моны эшнең катлаулырак булуы белән аңлата.

Алабугада баланы беренче сыйныфка әзерләү якынча 15-20 мең сумга төшә. Бу суммага мәктәп формасы (кызлар өчен: күлмәк, ике пар алъяпкыч; малайлар өчен: костюм-чалбар, ике пар күлмәк), түфли, алмашка аяк киеме, спорт киеме, мәктәп букчасы, икенче аяк киеме салып йөри торган сумка, ике-өч пар колготки, бантиклар, ике галстук, каеш, канцтоварлар, чәчәк бәйләме бәясе керә.