Алабуга районы аграрийлары урып-җыю эшләрен төгәлләде

Алабуга муниципаль районы аграрийлары 20,9 мең гектар мәйданда бөртекле һәм кузаклы культураларны җыеп бетерде. Районда беренчеләрдән булып уңышны «Яңа Юраш», «Якты үзән» җәмгыятьләре, КФХ Әхмәтҗанов Ф. Г. хуҗалыгы җыеп алды. Барлыгы 45 мең тонна ашлык суктырылган.

Район буенча иген культураларының уңышы гектарына 24 центнер тәшкил итә. Күләме буенча ашлыкны иң күп суктыручы хуҗалыклар: «Яңа Юраш» — 10,8 мең тонна, «Аммоний Агротехнологияләре» — 6,7 мең тонна, «Мир» — 5 мең тонна. «Вятские Зори» агрофирмасында игеннәр уртача район күрсәткеченнән югарырак — гектарына 35 центнер, «Аммоний Агротехнологияләр» дә — гектарына 30 центнер, «Яшь көч» агрофирмасында — 29,4 центнер, «Мир» хуҗалыгында — 26 центнер.