Алабуга районы комбайнчыларының 2 ункөнлек хезмәт нәтиҗәләренә йомгак ясадылар

Август ункөнлекләре буенча, район комбайнчыларының хезмәт нәтиҗәләренә йомгак ясадылар. 

Беренче ункөнлектә «Яңа Юраш» агрофирмасыннан Тимур Хәмидуллин алдынгы дип танылды, ул «Акрос-580» комбайнында 968 тонна ашлык суктырган.
Икенче урында шул ук хуҗалыктан «Акрос-580» комбайнында эшләүче Руслан Хәмидуллин, аның исәбендә — 951 тонна.

«Яшь көч» агрофирмасыннан Дамир Гәрәевнең эш нәтиҗәсе — 843 тонна булган. 

Августның икенче ункөнлегендә беренче урынны «Яшь көч»тән Зөлфәт Шәкүров яулады — аның «Акрос-585» комбайнында эш нәтиҗәсе 750 тонна булган.

«Мир» ҖЧҖ комбайнчысы Сергей Радзевигус («Тукано-580») 551 тонна ашлык суктырган.

550 тонна — монысы Әхмәтҗанов КФХ (Морт) комбайнчысы Фәнил Ибраһимов күрсәткән нәтиҗә. 

Район авыл хуҗалыгы һәм азык-төлек идарәсе башлыгы Александр Косов хәбәр итүенчә, җиңүчеләрнең барысына да район башлыгының рәхмәт хатларын һәм акчалата бүләкне кырда тапшырдылар.