Алабуга районындагы чәчү эшләре озакка сузылган яңгырлар аркасында тоткарлана

Алабуга районындагы чәчү эшләре озакка сузылган яңгырлар аркасында тоткарлана. Район башлыгы Рөстәм Нуриев белән очрашуда авыл хезмәтчәннәре билгеләп үткәнчә, эшләр май ахырына кадәр сузылса, уңыш яхшы булмас.

Яшелчәчелеккә һава торышы әлегә зур үзгәрешләр кертмәде. «Нократ таңнары» агрофирмасы җитәкчесе Сергей Полынкин сүзләренә караганда, әлегә җир дымлы гына түгел, салкын да.

— Мөгаен, быел суган утыртмабыз. Кәбестә, чөгендер, кишер, бәрәңге утыртырга ниятлибез. Һава торышының яхшырачагына өмет аз, — диде авыл хуҗалыгы җитештерүчесе.