Алабуга районының Танайка авылында гомер итүче Владимир Виноградов 20 ел виноград үстерү белән шөгыльләнә

Алабуга районының Танайка авылында гомер итүче Владимир Виноградов менә инде 20 елга якын үз бакчасында виноград үстерә. Күпләр, мөгаен, безнең як климаты көньяк җиләк-җимешләре үстерүгә туры килми, дип саныйдыр. Әмма климат кына моңа киртә була алмый икән. Без моны үз күзләребез белән күреп кайттык. 
Владимир Виноградовның хуҗалыгына карап, әлеге көньяк культурасының безнең якта да менә дигән итеп үсә алуын аңлыйсың. Капкадан керүгә үк, берсеннән берсе матур, зур виноград тәлгәшләре күзләрне кызыктыра, күңелләрне соклану хисе биләп ала.
Шунысы кызыклы, Владимир Василий улының хәтта фамилиясе дә мавыккан эшенә аваздаш. 20 ел элек виноград үстерү остасы төньякта яшәгән һәм анда да татлы җимешне үстереп караган, әмма уңыш алуга ирешмәгән. 2000нче елда исә ул Танайкага күченеп кайта һәм инде шул вакыттан бирле виноград үстерә. Хәзер аның хуҗалыгында 46 төп виноград бар. Араларында нинди генә сортлар юк — «Изумруд», «Кардинал» һәм башкалар. Булганын үстереп кенә калмыйча, параллель рәвештә яңа куаклар да утырта Владимир Виноградов. Бакча участогында әлеге җимеш ачык грунтта, җиләс һавада кояш нурлары белән җылынып үсә, шуңа күрә дә яхшы уңыш бирәдер, мөгаен.
— Бер төптән якынча 50-60 килограмм виноград җыярга була. Кызганыч, быел уңышның 30 проценты боз явудан һәлак булды, — ди виноград үстерү остасы.
Соңгы елларда күпләр әлеге культураны яратып үстерә башлады. Шуңа күрә Владимир Виноградов янына да киңәш сорарга, тәҗрибә уртаклашырга килүчеләр шактый. 
− Мин бер зур куакка якынча 40-45ләп бөре калдырам. Бөреләр азрак булган саен, җимешләр күбрәк үсә. Ә менә бу бөредән чыккан үрентене калдырам, әмма анда җимеш үстермим. Ни өченме? Уңышны җыеп алуга, искерәк чыбыкны өзеп алам, ә менә бу — җимеш үсмәгәне аның урынын алачак һәм киләсе елда мул уңыш бирәчәк. Виноград утыртучыларның күбесе беренче елдан ук уңыш алырга тели. Нәтиҗәдә, виноград тәлгәше авырый башлый. Виноград, башка җиләк-җимешләр кебек үк, тукландыру да таләп итә. Миндә барысы да табигый, кирәкле минераллар һәм азот булган гадәти көл һәм тирес кулланам. Бу культура үзенә зур игътибар таләп итә, аны тиешенчә карап тоткан очракта гына ул уңыш белән куандырачак, — дип эш серләре белән уртаклашты Владимир Василий улы. 
Виноград үстерү остасы туганнарын һәм танышларын яңа өлгергән җимеш белән генә түгел, ә сок, йөзем, шәраб белән дә рәхәтләнеп сыйлый. Кемнәрдер кояш нурында җем-җем килеп торган виноград тәлгәшләрен күреп, җаннарына рәхәтлек ала, башка берәүләр хуш исле тәмле җимешләрдән авыз итмичә китә алмый. 
Владимир Василий улы бакчасында ниләр генә үстерми. Биредә виноградтан кала да җиләк-җимеш агачларын санап бетерерлек түгел. Кайчандыр хәтта персик белән хөрмә дә утыртып караган булган ул. Гомумән, бакчаның бөтен җирендә тәртип. Әңгәмә ахырында әле аның кәрзиннәр үрергә, гитарада уйнап, җырлар җырларга да яратуын белеп алдык. 
Владимир Виноградов киләчәккә зур өметләр баглый. Җимеш агачларының мул уңыш китерәчәгенә ышанып, җиң сызганып эшли ул. Бу сезонда уңыш җыя башлауга да якынча ике атна вакыт калып бара.