Алабуга нуры

Дөнья ямьле булсын өчен, Әни кирәк!

23 ноябрьдә, Алабуга районының Илмәт авылы мәдәният йортында Әниләр көненә багышланган “Авылда туып, читтә яшәсәм дә, кайттым әле әни яннарына” дип исемләнгән кичә узды.

Ноябрьнең соңгы якшәмбесендә (быел ул 24 ноябрьдә үтте) Россиядә үзенчәлекле бәйрәм – Әниләр көне билгеләп үтелә. Һәр кешенең иң якын, иң кадерле кешесе – ул әни. Шуңа күрә дә, бу иң матур бәйрәмнәрнең берсе. Ничә генә яшь булмасын, безгә һәрвакыт әни, аның мәхәббәте, игътибары, киңәше кирәк. Алар яраткан кебек безне беркем ярата алмас!

Әниләр көненә багышланган кичәне Илмәт мәдәният йорты директоры Фәүзия Төхбәтуллина оештырган иде.

– 20 ел инде шундый матур чара үткәрергә хыялланган идем. Хыял бер нәрсә, ә аны тормышка ашыру өчен күп тырышлык куярга кирәк. Ниһаять, бөтен уйларны туплап,тәвәккәлләдем. Кичәгә бик күп халык килде, авылыбызга кайткан кунаклар да шактый иде. Хыялым тормышка ашты, – дип хис-кичерешләре белән уртаклашты Фәүзия Мидхәт кызы.

Алып баручылар Диләрия һәм Альберт Хәбибуллиннар иде. Концертны үзенең матур җыры белән Илмәт кызы, хәзерге вакытта Морт мәдәният йортында эшләүче Гөлфинә Гаффанова башлап җибәрде. Аның улы Илназ, әнисе кебек үк, сәнгатькә гашыйк, ул дәртле биюләре белән залда утыручыларны шаккаттырды. Аннан соң Илмәт авылы кызы Кадрия Даутова (Нуруллина) чыгыш ясады. Аның йомшак, моңлы тавышы барыбызның да күңеленә хуш килде. Хәзерге вакытта ул Алабуга мәктәпләренең берсендә укытучы булып эшли.

Катнашучыларның иң активы Илмәт авылы егетләре Җамалетдиновлар булып чыкты: өч бертуган һәм онык үзләренең җырлары белән тамашачы күңелен яулап алды. Алар, әниләрен тәбрикләп, гөл бүләк итте.

Залда утыручы әниләр, әбиләр арасындагы бер ханым турында аерым әйтеп китәсе килә. Ул – Наилә Җамалетдинова. Буе кечкенә генә булуга карамастан, Наилә ханым берүзе баһадирдай дүрт егет тәрбияләп, аларны олы тормыш юлына чыгара. Дүртесенең дә тормышлары тигез, бар нәрсә дә җитеш. Алар моңа үз тырышлыклары, булганлыклары белән ирешкән. “Оясында ни күрсә, очканында шул булыр”, диләр бит. Матур тәрбиянең дәвамы да матур шул.

Наилә ханым үзе дә оста итеп төрле рольләрне башкара. Ул моны бүгенге кичәдә дә күрсәтте.

Һөнәри осталыкны яшьтән үстерү зарур. Миннур Хайрулина белән кызы Динәнең чыгышы да моңа дәлил булып тора. Алар әниләренә кояш гомере кадәр озын гомер теләделәр.

Ләйсирә Сираева (Гатауллина) һәм аның улы Юраштагы һәм Илмәттәге әниләрен, әбиләрен бәйрәм белән котлап җыр башкардылар. Шулай ук Төхбәтуллина Фәүзия, аның кызы һәм әбиләре дә җырлады.

Илмәт авылы кызы Тәгъзимә Марданова Алабугада яшәүче Төхбәтуллина Һашиянең әниләргә багышлап язган шигырьләрен укыды. Икесенең дә әниләре мәрхүм инде.

Кичәне алып баручылар турында тулырак әйтсәк, Диләрия Юраш мәктәбендә үзебез укыткан кыз. Мәктәпне тәмамлап, Алабуга егетенә тормышка чыгып, бер кыз һәм бер ул үстерәләр. Үзе шәфкать туташы булып эшли. Аңа кичәләрне шундый оста алып бару сәләте бирелгән, мәктәптә дә ул актив, тырыш булды, бик матур җырлый иде. Якыннары да Диләриядән калышмый.

Әлеге матур кичә кайткан кунакларга, авыл кешеләренә бик ошады. Илмәт авылы халкы кешеләрне сөендереп, аларның күңелләрен күтәргән өчен бәйрәмне оештыручы Илмәт авылы мәдәният йорты директоры Фәүзия Төхбәтуллинага һәм барлык катнашучыларга да зур рәхмәтләрен җиткерә.

Сәкинә ШАКИРОВА, ветеран укытучы

Гөлнур ЯКУПОВА

Нравится
Поделиться:
Реклама
Комментарии (0)
Осталось символов: