Илмәт авылында әдәби очрашу

"Алабуга нуры" һәм "Мәдәни җомга" газеталарында "Гасыр яшьтәше" исеме белән басылып чыккан очерк герое 95 яшьлек Минемулла Нәҗипов мәҗлеснең төп күрке булырга тиеш дип планлаштырылса да, ул, кайбер сәбәпләр аркасында, очрашуга килә алмады. Шулай булса да, кичәгә килүчеләр якташларын зурлап һәм хөрмәт белән телгә алып үттеләр, очрашуда дулкынланып чыгыш ясаучы Мәскүрә апа Сәлимова, Салих ага Хөсәенов (алар икесе дә Иске Юраш авылыннан), Мәсхүдә апа Гатауллина, Нургаян абый Нуруллиннарның (болары - илмәтлеләр) кимлек-җитмәүчелектә үткән балалык елларын, авыр үсмер чакларын һәм аннан соңгы тормыш юлларын күңелләре нечкәреп тыңладылар.

Аерым алганда Мәсхүдә апа: "Кеше, кагыйдә буларак, балачагын сагына. Ә мин, хәтта мөмкинлек туса да, балачагыма әйләнеп кайтмас идем", - дип сөйләде керфекләре яшькә чыланып.

Ирле-хатынлы Әнвәр һәм Розалия Мөхәммәтҗановлар яшьлек елларын сагынып искә алды. Аларның беренчесе, ул хезмәт иткән узган гасырның 60 нчы еллар уртасында Армиядә "бабайлык" күренешләре күзәтелмичә, идеаль тәртип булуын һәм хәзер дә егетләрнең Ватанны сакларга барырга бурычлы икәнлеген, тик моның өчен тәртип кертергә кирәклеген ассызыкласа, икенчесе - ничек итеп яшьләрнең колхоз болынына печән чабарга теләп баруларын матур итеп тасвирлады.

Өлкәннәр, тормыш рәхәтлеге ягыннан, үткән белән бүгенге көн арасында аерманың җир белән күк арасы икәнлеген әйтсәләр дә, җәмгыяви тормышта әдәп-әхлак, гореф-гадәт һәм милли традицияләрнең нык какшавын; авылда яшәргә нигездә карт-карчыклар гына калып, аның киләчәге бик томанлы икәнлегенә тирән борчылу белдерделәр. Дәүләтнең авылга йөз белән борылуына өметләрен өзмәүләрен әйттеләр.

Илмәт авыл җирле үзидарәсе рәисе Илфат Шакировның Ватанны саклаучылар көне уңаеннан кичәгә җыелучыларны котлавы, авылның ветераннар советы рәисе Сәкинә Шакированың ветераннарга һәм кунакларга теләгән изге теләкләре һәм язучы Фирдәвес Хуҗинның очрашуга кагылышлы аңлатмалы чыгышыннан соң башланып киткән язма геройлары белән тел-лөгать алмашу күркәм чәй өстәле артында шактый озак дәвам итте.

Үзем күп еллар Иске Юраш авыл мәктәбендә укытучы булып эшләгәнлектән, бераз күңелгә тигән кимчелек турында да әйтеп китмичә булдыра алмыйм. Китапханә мөдире Минсылу Җамалетдинова әйтүенчә, ул, "Сталинград сугышына 70 ел", "Гасыр яшьтәше" дип исемләнгән очрашуга балаларны да җибәрүне сорап, мәктәп җитәкчелегенә мөрәҗәгать иткән булган. Тегеләре: "ярар", дисәләр дә, кызганычка, бер укучы да очрашуга килмәгән иде. Бу бик сәер, әлбәттә. Урта һәм өлкән буын үрнәгендә үсеп килүче буынны тәрбияләүнең менә дигән мөмкинлекләреннән берсе ич инде бу чара! Шуны аңласак иде.

Сәкинә Шакирова,

ветеран укытучы,

Илмәт авылы