Хәлил Сабирҗанов: «Бөтенесенең сәгать кебек эшләве мөһим»

Бу хуҗалык даими үсә, камилләшә бара, хәзер ул районның авыл хуҗалыгы предприятиеләре арасында әйдәп бара торганнарның берсе.
Хуҗалыкның җитәкчесе Хәлил Сабирҗанов әйтүенчә, бу ел алар өчен гади булмаган. Ул коры килде, ләкин шулай да ашлык һәм терлек азыгын җитәрлек хәзерли алдылар.

− Төп бурычыбыз — ашлык, ит, сөт җитештерү һәм терлек азыгы әзерләү. Без берничә юнәлештә барабыз, шуңа күрә бөтенесенең сәгать кебек эшләве мөһим. Техника монда зур әһәмияткә ия. Соңгы елларда машина-трактор паркын яңарта башладык, «Рослизинг» аркылы авыл хуҗалыгы машиналарын күп алабыз: комбайннар, тракторлар, − дип сөйли агрофирма җитәкчесе.

Авыл хезмәтчәннәре кышын да эшсез утырмый. Алар машиналарны яңа чорга әзерләү белән мәшгуль, терлекчелеккә дә күбрәк вакыт бирү өчен мөмкинлек барлыкка килә. Хәзер «Яңа Юраш» агрофирмасында 2150 баш мөгезле эре терлек асрыйлар, шулардан 800 баш — савым сыерлары.

− Без сыерларыбызның нәтиҗәлелеген арттырырга омтылабыз. Тәүлегенә уртача 14 тонна сөт савып алына, шуның 12 тоннасын сатабыз. Бүген савым кимегән вакыт, Яңа елдан ул арта барачак, − дип аңлата Хәлил Нуретдин улы.

Ниятләре — савымны тагын да арттыру. Моның өчен малларны тулы кыйммәтле тукландырырга кирәк. Хуҗалыкның баш зоотехнигы Земфира Мөхәмәтҗанова сөйләвенчә, олы сыерларны алар көненә өч тапкыр ашата. Фураж, сенаж, соя түбе, печән, кукуруз силосы һәм терлек азыгы өстәмәләре бирәләр.

− Безгә хәзер төп табыш сөттән килә. Аның майлылыгы — 3,9 процент, аксымы — 3,4, сыйфат ягыннан бу әһәмиятле, − ди белгеч.
Сөтлебикәләрне чит илдә чыгарылган махсус аппаратлар белән савалар. Авыл хуҗалыгы җитештерүчесе аңлатуынча, әгәр сыерның сөте бетә икән, хезмәткәр җайланманы вакытында алып өлгермәсә, җилемнәргә массаж башлана, һәм бу ялкынсыну авыруын булдырмаска ярдәм итә.

Хуҗалыкта үсеп килә торган токымны да онытмыйлар, 150гә якын бозау якты һәм җылы абзарда яши. Һәр хезмәткәрне алар тату мөгрәү белән каршы ала — шулай сәламлиләр, фураж, солы, печән, сенажны яхшы ашыйлар һәм, әлбәттә, җылы сөт эчәләр.

"Яңа Юраш"та киләсе июль-августта 220 баш тана өчен зур ферма салынып бетәчәк.

− Быел ферма төзелешен башладык. Эшне оештыручылар булышты. Эчке эшләре калды әле. Җәен анда терлекләрне җибәрәчәкбез, алар анда бәйдә дә, бәйдән башка да йөриячәк. Яхшы таналар үстерсәк, сөт тә булачак, − ди Хәлил Сабирҗанов.