Алабуга нуры

Күренмәс фронт көрәшендә

Иң яхшы комбайнчылар бүләккә лаек булды. Үткән дүшәмбедә район кырларында ашлык җыя торган комбайннар һәм үзйөрешле чапкыч механизаторлары арасында быелгы урып җыюда катнашып җиңү яулаганнарны данладылар.

Ашлык суктыруда беренчелекне алган 12 хезмәткәр – яхшыларның яхшысы, шуңа күрә алар мактау грамоталары алды һәм бик күп җылы сүзләр ишетте. Матди өлеше дә мөһим, билгеле – район башлыгы урынбасары Зөлфия Сөнгатуллина комбайнчыларга акчалата бүләк тапшырды һәм конкурста җиңүләре белән котлады. Бүләкләү тантаналы төстә үтте – җирле хакимият вәкилләре белән бергә, аграрчылар янына “Сөембикә” һәм “Ак каз” фольклор ансамбльләре килде. Дөресен әйтергә кирәк, бүләккә ирешүчеләр үзләре бернинди бәйге турында уйламаганнар да һәм җиңү хакында хыялланмаганнар. Алар өчен иң әһәмиятлесе – урып-җыюны үз вакытында тәмамлау.

– Мине бүләкләрләр дип берничек тә көтмәгән идем. Көн гадәттәгечә башланып китте, ә монда – шундый сюрприз! Бервакыт, ике еллап элек, андый бүләк алганым булды, ягъни монысы икенче тапкыр. Уңышны алу яхшы гына бара, ашыкмыйбыз, ярыйсы эшлибез. Аллага шөкер, һава торышы рәтләнде, – дип сөйли “Яңа Юраш” агрофирмасы комбайнчысы Александр Журавлев, аның җиде еллык стажы бар.

Бу көнне “Яңа Юраш” механизаторлары Александр Овчинников, Рафит Гыйззәтуллин, Илсур Шәйдуллин, Тимур Хәмидуллин һәм Илфат Гомәров та бүләк алды. “Башак” җәмгыяте, “Морт”, “Яшь көч” хуҗалыкларыннан берничә хезмәткәр шулай ук алдынгылар рәтендә. Алар – күренмәс фронт көрәшчеләре һәм һәрберсе хөрмәткә лаек, яңгырлар аркасында эш тоткарланып торганга, һәммәсенең күңелен күтәрү кирәк, диләр районның Авыл хуҗалыгы һәм азык-төлек идарәсендә.

Бу чара бер генә мәртәбә уза торган түгел. Бездә һәр атна саен, ничек эшләвенә карап, уникешәр кеше бүләкләнәчәк. Кайсы механизатор ашлыкны күбрәк суктыра, шул комбайнны йөртүчеләр бүләк алачак, –  дип сөйләде район Авыл хуҗалыгы идарәсе башлыгы вазифаларын башкаручы Александр Косов.

Быелгы уңышны җыеп алу күләменә килгәндә, ул якынча 50 процентка төгәлләнгән. Александр Косов сүзләренә караганда, район аграрчылары көненә гомуми мәйданның 4 процентын диярлек эшкәртә, бу исә тәүлегенә якынча 1000 гектар ашлык суктырыла дигән сүз. Исегезгә төшерәбез, авыл хезмәтчәннәренә уңышны барлыгы 25 мең гектардан җыеп алырга кирәк. Алабуга районының Авыл хуҗалыгы һәм азык-төлек идарәсе мәгълүматына караганда, бүгенгә уртача уңыш гектардан 25,5 центнер тәшкил итә.

Районның кайбер хуҗалыклары алдынгы урыннарда бара. Мәсәлән, “Яшь көч” агрофирмасында уртача уңыш бер гектардан 31 центнер, “Нократ таңнары”нда гектардан 33 центнер алуга ирешкәннәр.

Нравится
Поделиться:
Реклама
Комментарии (0)
Осталось символов: