Алабуга нуры

Рецептлар

Авокадоның искиткеч файдалы булуын сөйләгән идек инде. Газета һәм сайтны укучылар соравы буенча сезнең хозурга тагын берничә рецепт тәкъдим итәбез.

Кайнар бутерброд

1 авокадо, 4 телем арыш ипие, 1 суган, 8 пешкән креветка, 2 аш кашыгы угычтан кырылган каты сыр, тоз, борыч алына.

Авокадоның кабыгын чистартып, төшен алалар һәм телемләп турыйлар. Аларны ипи кисәкләренә тезәләр. Өстенә креветка, ярымбоҗралап киселгән суган куялар. Тоз, борыч һәм сыр сибеп, берничә минутка кайнар мичкә тыгып алалар.

Бутерброд организмга көч кертә, бәхет гормоны-серотонин бүлеп чыгарып, кәефне күтәрә.

Авокадо һәм дингез ризыклары

1 авокадо, 150 г лосось яки сөмбаш (семга) балыгы, 100 г пешкән креветка, 1 кызыл баллы борыч алына.

Соус өчен 2 аш кашыгы зәйтүн мае, ярты лимон согы, тоз, борыч кирәк.

Авокадо белән борычны шакмаклап, балыкны тасмалап турыйлар. Тәлинкәгә авокадо җәяләр, аның өстенә балык куялар һәм креветка тезәләр. Зәйтүн маена лимон согы салып болгаталар. Тоз, борыч сибеп соус ясыйлар һәм калган ризыклар өстенә агызалар.

Бу-туклыклы салат. Ул микроэлементларга һәм кальцийга бай. Аны гемоглобины түбән кешеләргә ашарга киңәш итәләр

Әче соус

3 авокадо, 6 кыяк яшел суган, 2 тырнак сарымсак, 1 аш кашыгы дарчин, 1 лимон согы кирәк.

Мексикада бу соусны гуакомоле дип йөртәләр. Аны ясау өчен авокадоны чистартып, йомшагын бертөрле катнашма барлыкка килерлек итеп изәләр. Калган әйберләрне вак кына турап авокадога салалар. Тоз, лимон согы өстиләр. Бу соусны итле ризыклар ашау өчен кулланалар.

Ул ашкайнату процессын җайга сала, аппетитны ача, организмга хәл кертә.

Экзотик эчемлек

1 авокадо, 1 стакан сөт, 1 чәй кашыгы шикәр, 3 шакмак боз кирәк.

Авокадоны юып, урталай яралар, төшен алалар. Җимешнең кабыгын чистарталар. Йомшагын блендер ярдәмендә болгаталар. Шунда ук сөт, шикәр һәм боз өстиләр. Бертөрле катнашма барлыкка килгәч, эчемлекне стаканнарга салып, авокадо телемнәре белән бизиләр.

Коктейльне ашказаны-эчәк трактында тайпылышлар булган кешеләргә эчәргә киңәш ителә.

Нравится
Поделиться:
Реклама
Комментарии (0)
  • 23 октября 2017 в 14:24
    Защити себя!