Алабуга Бөек Ватан сугышы башлануын ничек каршы алган

Германиянең Советлар Союзына һөҗүме бөтен халык өчен, шул исәптән алабугалылар өчен дә зур тетрәнү булды. 1941 елның июнендә шәһәрдә ниләр булган соң?

23 июнь иртәсендә Алабуга предприятиеләрендә һәм колхозларда митинглар узган, анда фашистларның илебезгә һөҗүм итүләре турындагы хәбәр укылган. Завод һәм артель хезмәткәрләренең дошманның мондый хыянәтенә ачулары чыга. Әмма бу алабугалыларның рухын ныгыта һәм аларны көрәшкә күтәрә.

«... бөтен совет халкы белән бергә тагын да зур күтәрелеш белән Ватан файдасына эшләячәкбез һәм Совет халкының большевиклар партиясе һәм аның юлбашчысы иптәш Сталин һәм Совет хөкүмәте җитәкчелегендә дошманны җиңәчәгенә ышанабыз. Без теләсә кайсы минутта Ватаныбыз чикләрен якларга әзер», — дип язып чыга «15 лет Октября» артеле эшчеләре «Сталин юлы» газетасы битләрендә.

Шул ук көннән хәрби бурычлыларны мобилизацияләү башлана, күпләр военкоматка үз теләкләре белән киләләр, алар арасында хатын-кызлар да була. С. Шиһабетдинов язганча, мобилизациянең беренче көнендә үк район хәрби комиссариатына ватанпәрвәрләрне үзләре теләп Кызыл Армия сафларына алуларын, Ватанны саклауга җибәрүләрен сорап, шактый гаризалар килгән. Алар арасында Ватанның яшь патриотлары — А. С. Исаева, А. А. Долина, Л. Белоборода, М. И. Красноперова һәм Тарасова. Алар РККА сафларында булу теләге белән янулары турында язалар һәм социалистик Ватанны Гитлер варварларыннан нык саклаячакларына ышандыралар.

Ирләрне хатыннары эштә алыштырып, аларга ярдәм итә, ә әниләр фашистларга каршы көрәшкә киткән уллары турында газетага горурланып язалар. Алабугалы А. А. Долганованың дүрт улы була, барысы да Кызыл Армия сафларында хезмәт итә. Улы Сережа акфиннар белән сугышта яралана. Ярасы төзәлгәч, бурычын намус белән үтәп, өенә кайта. Бөек Ватан сугышы башлангач, ул яңадан фронтка китә.

«Аның РККАга чакырылуын мин Совет иле әниләренә хас булганча шатланып каршы алдым. Кулына мылтык тотып бәхетебезне һәм үз илен сакласын. Саубуллашканда мин улыма: «Бандитлар белән рәхимсез сугыш, өйгә җиңү белән генә кайт», — дидем. Икенче улым Федяны да Ватанны саклауга әзерлим», — дип язган А. А. Долганова.

Алабуганың башка гаиләләрендә дә шулай булган, чөнки ул вакытта бөтен ил дошманга каршы күтәрелеп, «Барысы да фронт өчен! Барысы да җиңү өчен!» дигән девиз астында яши башлый.