Алабуга ветераны Равил Мостафинга юбилей медале тапшырылды

Алабугада яшәүче ветеран Равил Мостафинга кунакка район башкарма комитеты җитәкчесенең социаль үсеш буенча урынбасары Елена Мерзон килде. Җитәкче Равил Гарифҗан улын район хакимияте башлыгы исеменнән котлады, аңа Бөек Ватан сугышында Җиңүнең 80 еллыгы уңаеннан медаль һәм чәчәк бәйләме тапшырды.

— Әти 1932 елда туган. Аның балачагы авыр сугыш елларына туры килә. Колхозда олылар аз була, шуңа күрә күпчелек эш балалар җилкәсенә төшә. Алар сөрәләр дә, чәчәләр, уңыш җыялар. Әти ачлык чоры турында аз сөйли, кайчак башаклар һәм черек бәрәңге ашаганнарын исенә төшерә. Ул вакытта фронтка ярдәм итү өчен ныклы тыл кирәклеген барысы да аңлап яшәгән. Шуның аркасында ил нык торган. Ул буынга сугыштан соңгы катлаулы еллар да туры килә, икътисадны торгызырга кирәк була, — дип уртаклашты ветеранның кызы, район башкарма комитеты җитәкчесе Эльмира Әхмәдиева.

Равил абый күтәренке рух һәм кәеф белән Җиңүнең 80 еллыгын көтеп яши.