Җиңү турында 80 факт: бер портрет тарихы

Портретта кемнәр төшерелгән, ни өчен ул Хәтер музеенда куелган? Чыннан да, сораулар күп. Җиңү юбилеена багышланган «Җиңү турында 80 факт» рубрикасында без бүген бу фотосурәттәге кешеләр турында сөйләрбез.

Фотопротретта Хәрби-диңгез флоты офицеры Борис Семенович Забражных һәм аның тормыш иптәше Ольга Сергеевна төшкән. Борис Семенович Ольга белән Мурзиха җидееллык мәктәбендә укыткан вакытта ук таныша. Гаилә портретын Алабуга дәүләт музей-ядкарьлегенә аларның оныгы — Сергей Забражных 2024 елның маенда бүләк итә.

Борис Забражных 1916 елның 8 маенда Алабугада туа. 1939 елда аны хәрби хезмәткә, Хәрби-диңгез флотына чакыралар. Аннан аны Кронштадтка җибәрәләр. Диңгез белгечлеге алып, якташыбыз Төньяк флотка китә. Биредә ул 1942 елның августына кадәр хезмәт итә. Хезмәт чорында ул Бөек Ватан сугышының күп кенә фронтларында, аерым алганда, Сталинград һәм Курск өчен сугышларда катнаша.

1943 елда чираттагы хәрби заданиене үтәгәндә Борис Забражных яралана һәм госпитальгә эләгә. Дәваланганнан соң аны данлыклы генераллар Николай Ватутин һәм Иван Черняховский командалыгындагы 1 нче Украина фронтына җибәрәләр.

— Җиңү көнен безнең данлыклы якташыбыз Мәскәүдә каршылый. Анда саперларны һәм флотның башка белгечләрен хәрби-диңгез эшенә өйрәткән вакыты була. Борис Забражных Бөек Ватан сугышының 1 нче Украина һәм Үзәк фронтларындагы каты сугышларда катнаша, «1941-1945 еллардагы Бөек Ватан сугышында Германияне җиңгән өчен», «Сталинградны саклаган өчен», «Совет Заполярьесын саклаган өчен», «Сугышчан казанышлары өчен» (1950) медальләре, II дәрәҗә Ватан сугышы ордены (1985) белән бүләкләнә, — дип сөйли Хәтер музее экскурсоводы Мәүлидә Мансурова.

Хәрби-диңгез флоты боцманының нәкъ менә шул парад кителе һәм фотографиядәге фуражка хәзерге вакытта Хәтер музеенда саклана.