Сугыш елларында Алабуга тормышы: сәнәгать

1941-1945 елларда Алабугадан һәм районнан фронтка барлыгы 14000 кеше китә, шуларның 7050е әйләнеп кайтмый. Югалтулар һәрбер Алабуга гаиләсендә булган.

Тылда калганнар Ватанга һәм аны саклаучыларга хезмәт фронтында ярдәм итәләр. Аларның көндәлек тормышы «Барысы да фронт өчен, барысы да Җиңү өчен!» лозунгы астында уза. Завод, фабрика һәм промысел артельләре эшчеләре, җитештерү планнарын арттырып үтәп, фронт өчен продукция җитештерүне арттыру өчен ярышалар.

Сугышның беренче елларында солдатлар өчен мамык куртка, чалбар, колакчын бүрек, бушлат, гимнастерка, чалбар, бияләй һәм башка әйберләр теккән «Смычка», «Ударник», «Кама», «15 лет Октября», «Ауче» артельләре планнан тыш 46700 сумлык продукция чыгарган. «15 лет Октября» инвалидлар артеле коллективында тегү цехы көн саен 2-2,5 норма үтәгән.

Механика заводы хезмәткәрләре оборона әһәмиятендәге продукция җитештерү буенча яңа производствоны үзләштерә: граната корпуслары, мина шартлаткычлары башлары ясыйлар. Фронтка киткәннәре урынына заводка килгән яшь эшчеләр югары хезмәт җитештерүчәнлеге үрнәкләрен күрсәтә. Алабуга МТСында комсомоллар оборона промышленносте ихтыяҗлары өчен металлолом һәм төсле металл җыюны җәелдерә.