Алабуганың «Фиеста» бию театры «Star Friends Fest!» халыкара конкурсыннан җиңү яулап кайтты

21 майда Казанда балалар, яшүсмерләр һәм зурлар катнашында «Star Friends Fest!» дип аталган күп жанрлы халыкара конкурс үтте. Бу конкурс-фестиваль иҗат коллективларыннан һәм сәнгатьнең төрле өлкәләреннән сәләтле башкаручыларны табуга, аларның иҗат мөмкинлекләрен киңәйтүгә, шулай ук барлык төр инвалидларга да конкурста оештыру түләүләрен кертми генә катнашу мөмкинлеген биреп, хәйриячелек эшчәнлегенә юнәлтелгән. 

«Фиеста» бию театры 14 бию номеры тәкъдим итте, шуларның 12се беренче урынны алды. 

— Без нәтиҗәдән бик канәгать — 12 беренче урын һәм ике Гран-При! Бар биючем дә булдыра. Хезмәт сөючәнлегебез нәтиҗәсе бу, — ди коллектив җитәкчесе Эльвира Шәесламова.

Әйтергә кирәк, Гран-При аларга «Хореография» (Заманча бию) номинациясендә 10-11 яшьлекләр арасында «Поезд 24» һәм шул ук номинациядә 19-25 яшьлекләр арасында «Бу Мин түгел бу Алар» чыгышы өчен бирелде. 

Коллективта 14 яшьлек Аделина Гарифуллина да бар. "Фиеста"да ул инде 8 ел. Концертларга аны еш кына әнисе озатып йөри. Ул безнең белән конкурста алган кичерешләре белән уртаклашты:

— Чираттагы тапкыр мин балалар белән конкурска киттем. Бу юлы — Казанга. Чыгышлар күп иде, мин концертны карый да алмабыз, балаларга кием алыштырырга булышасы булыр дип уйлаган идем, ләкин балалар (алар 90 кеше), хәтта кечкенәләре дә, шулкадәр оешкан булды, без, ата-аналар, залда урнашып беттек... Концерт башында ук аңладык: балаларыбызга тиңнәр юк. Шул чагында балаң өчен шундый горурланасың! Бәләкәй шәһәрдә яшибезме, зурдамы, әһәмиятле түгел, иң мөһиме — укытучының нинди булуы...Педагог Эльвира Нуримановна балаларга ни әйтәдер, белмим, ләкин чыгыш ясаганда, аларның йөзләре гаҗәеп үзгәрә! Әлбәттә инде, балаларыбызның җиңүе хореография укытучысы Эльвиры Шәесламованың иҗат нәтиҗәсе. Аның тырышлыгыннан башка, безнең шәһәр мондый дәрәҗәдә осталыкны күрмәгән булыр иде.