Алабугада «Алабуга нуры» һәм «Новая Кама» газеталары призларына йөгерү ярышлары булачак

5 майда Алабугада традицион рәвештә район газетасы призына җиңел атлетика эстафетасы узачак. Узган ел ул пандемия аркасында үткәрелми калган иде.
Алабугалылар Үзәк стадионда йөгерүдә көч сынашачак. Катнашучыларны теркәү 13 сәгать 30 минуттан 14 сәгать 25 минутка кадәр узачак. Йөгереш сәгать 15.00тә башлана.
Быел эстафета 51нче тапкыр оештырыла. Эстафетада гомуми белем бирү, урта махсус һәм югары уку йортлары укучылары, мәктәпкәчә яшьтәге балалар һәм мәктәп укучылары, Алабуга районының җитештерү коллективлары катнашачак.
Җиңүчеләр күчмә кубок, диплом һәм татлы призлар белән бүләкләнәчәк.