Татарстанда 1 сентябрьдә сигез яңа мәктәп ачылачак

Татарстанда яңа уку елында беренче тапкыр 56 679 беренче сыйныф укучысы мәктәп бусагасын атлап керәчәк. Билгеләп үтик, узган ел белән чагыштырганда быел 5 358 балага күбрәк. 
ТР Мәгариф һәм фән министры Рафис Борһанов хәбәр иткәнчә, бүген Татарстанда сигез яңа мәктәп һәм 19 мәктәпкәчә белем бирү учреждениесе эшли башлаячак. 
Татарстан өч илкүләм проектны — «Демография», «Мәгариф» һәм «Фән», шулай ук алты федераль программаны гамәлгә ашыруда катнаша, алар арасында — «Заманча мәктәп», «Һәр баланың уңышы», «Цифрлы белем бирү мохите», «Киләчәк укытучысы». 
Министр педагогларга хезмәтләре өчен рәхмәт белдерде, ә укучыларга киләсе уку елында бик яхшы билгеләр генә алуларын теләде. 
Яңа уку елында Алабуга районында 23 гомуми белем бирү учреждениесе эшләячәк. Аларда 9651 бала белем алачак.