Алабуга үзәк район хастаханәсенә респираторлы битлекләр тапшырылачак

Иртәгә Алабуга үзәк район хастаханәсенә 3D бастыру технологиясе ярдәме белән полилактидтан ясалган респираторлы 150 битлек һәм алар өчен 45 мең фильтр китереләчәк. Битлек күп тапкыр кулланып була торган, аны файдалану вакытында фильтрлаучы элемент кына алмаштырылырга тиеш.

Алабуга медикларына мондый хәйрия ярдәмен "Левитта" ҖЧҖнең Казан фирмасы күрсәтә. Бу оешма әлеге респираторлы битлекләр ясау белән шөгыльләнә. Алар шулай ук битне саклау өчен 150 щит та бирәчәк.