Алабуга нуры

Алабуга районында тагын бер фельдшер-акушерлык пункты барлыкка килде

Ул районның Колосовка авылында ачылды.

Алабуга районы Колосовка авылында яңа фельдшер-акушерлык пункты ачылды, ул авыл халкына беренчел медицина-санитар ярдәм күрсәтүнең сыйфатын яхшырту максатларында республика программасы буенча төзелде. Ачылу тантанасында Алабуга районы башлыгы урынбасары Олег Колпаков катнашты. Ул район башлыгы Рөстәм Нуриев исеменнән авыл халкын яңа социаль әһәмияткә ия объект ачылу белән котлады.

— Бүген без фельдшер-акушерлык пункты ачабыз. Ел ахырына кадәр тагын икесен куллануга тапшырырга планлаштырабыз. Авыл халкы өйләреннән ерак китмичә сыйфатлы медицина ярдәме ала алсын өчен, Республика җитәкчелеге авылда табиб ярдәме күрсәтүгә зур игътибар бирә. Республика программасы буенча ФАПлар киләчәктә дә төзеләчәк. Шуңа күрә аларның хезмәтеннән файдаланыгыз, ә иң мөһиме — авырмагыз, — диде Олег Колпаков.

Үзәк район хастаханәсенең баш табибы Рамил Сәфәров билгеләп үткәнчә, заманча фельдшер-акушерлык пункты кирәкле җиһазлар белән җиһазландырылган.
Әлеге ФАПның Яңа ел алдыннан ачылуы символик рәвештә булды. Шуңа күрә ачылу тантанасына Кыш бабай да килде, ул барлык катнашучыларны котлады. Кунаклар кызыл тасманы тантаналы рәвештә кискәннән соң, авыл халкы медицина ярдәме пунктының эченә кереп, аның белән таныша алды.

Сүз уңаеннан, әлегә җирле халык медицина ярдәме өчен берничә йорт аша урнашкан кирпечтән төзелгән иске фельдшер-акушерлык пунктына мөрәҗәгать итә. Яңа ФАП авыл халкын кабул итәргә әзер булуга, алар медицина ярдәме сорап заманча бинага килә алачак.
Колосовка ФАПы мөдире Луиза Котлыбаева да тиздән яңа бинага күчүгә бик шат. Ул фельдшер булып 20 ел эшли, шуларның 16сы — Колосовка авылында.

— Шунысын билгеләп үтәсем килә, Колосовка авылы халкы бик төгәл, һәрвакыт медицина хезмәткәренең барлык киңәшләрен һәм билгеләнешләрен үти. Яңа ФАП зурлыгы буенча иске бинага караганда кечкенәрәк булса да, ул заманча җиһазландырылган һәм компактлы, бу бик уңайлы. Биредә пациентларны кабул итү өчен кирәкле бөтен нәрсә бар. Алар да моны бәяләр дип ышанам. Яңа ел алдыннан бу бик яхшы бүләк, — ди Луиза Наил кызы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: