Алабуга нуры

Алабуга шәһәренең 5нче мәктәп укучылары уникаль мөмкинлек алды

Алар гади гомуми белем бирү мәктәбенең генә түгел, ә университет мәктәбенең бер өлеше булачак. Бишенче мәктәп Казан федераль университетының Алабуга институты структурасына керде.

Бишенче мәктәп Казан федераль университетының Алабуга институты структурасына керде. Безнең шәһәрдә мондый тәҗрибәнең булганы юк иде әле, дип сөйләде КФУның Алабуга институты директоры Елена Мерзон.
Әлеге карар Татарстан Республикасы Президенты Рөстәм Миңнеханов рәислегендә КФУның Күзәтү Советы тарафыннан кабул ителгән. 
«Университет мәктәбе»нең төп максаты — укучыларның белем сыйфатын гына түгел, ә укытучыларның һөнәри осталыгын да арттыру, шулай ук югары уку йорты студентларын «һөнәргә кертү».
«Бу бик кыю тәҗрибә. Сер түгел, әлеге мәктәпне тәмамлаучыларның белем сыйфаты күрсәткече районда иң югарылардан дип әйтеп булмый. Без үзебезгә амбициоз максат куйдык — бу хәлне тамырдан үзгәртү. Моның өчен педагогик югары уку йортының барлык кадрлары һәм матди-техник ресурслары җәлеп ителәчәк».
Хәзер шактый катлаулы чор булуга карамастан, быел республика бишенче мәктәпнең капиталь ремонтын финанслау мөмкинлеген булдырды, бу, үз чиратында, проектның әһәмиятен ассызыклый, дип билгеләп үтте Елена Мерзон. Аның сүзләренә караганда, әлеге максатларга республика казнасы 137 миллион сумга якын акча бүлеп биргән. Нәкъ менә хәзер бинаның фасады, интерьеры яңартыла. Капиталь ремонт белән беррәттән, уку йортының укыту һәм методик кабинетларын җиһазлау буенча да эш алып барыла. Яңа уку елына барысы да яңартылачак.
«Казан федераль университетының Казанның ике лицее белән эшләү тәҗрибәсе бар, әлеге лицейларга урта буын сәләтле укучылары конкурс нигезендә кабул ителә. Алабуга "университет мәктәбе«нең исә үзенчәлеге шунда: анда, элеккегечә үк, аңа беркетелгән микрорайон укучылары укыячак, гамәлдәге педагогик состав эшләячәк. Ә «университет мәктәбе» гомуми белем бирү мәктәбе балаларын яңа казанышлар дәрәҗәсенә алып барачак. Эксперимент кысаларында «университет мәктәбе» укытучылары үз дәресләрен вузның уникаль лабораториясендә — цифрлы белем бирү студиясендә әзерләү мөмкинлеге алачак. Моннан тыш, дәресләрне алып баруга мәктәп укытучылары гына түгел, ә вуз студентлары да кушылачак. Проектның идея рухландыручылары фикеренчә, әгәр дәресләрнең һәм өстәмә дәресләрнең бер өлешен укытучылар һәм студентлар алып барса, моннан барысы да — мәктәп укучылары да, булачак укытучылар да, тәҗрибәле педагоглар-остазлар да отачак кына.
Ә ата-аналарга килгәндә, аларга үз балаларының мәктәп тормышында тагын да активрак катнашырга туры киләчәк, дип билгеләп үтә Елена Мерзон.
Университетның бүген мәктәп укучылары өчен проектлары күп», дип билгеләп үтте КФУның Алабуга институты директоры. Бу — «Балалар университеты», «ИнтелЛето» балалар сәламәтләндерү лагере, җәйге физика-математика мәктәбе, IT-территория һәм башкалар. Беренче чиратта аларга «университет мәктәбе» укучылары керә ала, — ди ул.
Шулай итеп, «университет мәктәбе» — ул статус кына түгел, ә балалар өчен өстәмә мөмкинлекләр дә. Өстенлекләргә сәләтле балалар белән эшне, олимпиадаларга һәм фәнни конференцияләргә әзерлекне, университетка керүне кертергә була.
Безнең төп максат — репетиторларсыз мәктәп булдыру, балалар мәктәп һәм вуз педагогик коллективы алып барачак дәресләрдән максималь белем алырга өйрәнә алырга тиеш, шулай ук укучылар мәктәп эскәмиясеннән үк үзләре өчен университетта уку мөмкинлеген ача алачак, — дип сүзен йомгаклады Елена Мерзон.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: