Алабуга янгын сүндерүчеләре кисәтә: балаларны уттан саклагыз!
Җәйге яллар башлану белән балаларның буш вакытлары күбәйде. Ата-аналар аларның каникулда кайда буласын, ни белән шөгыльләнәсен алдан ук планлаштырып куйган булса, бик яхшы. Әмма кайбер бала-чага көннәр буе үз иркенә куелган, теләсә кая бәрелеп-сугылып йөри. Бала берүзе генә калгач, гадәттә, мөстәкыйльлеген тикшереп карый башлый.
Бу уңайдан Алабуга муниципаль районы буенча Күзәтчелек эшчәнлеге бүлеге инспекторы Александр Едоменко ата-аналарга шундый сорау белән мөрәҗәгать итә: Балаларыгызның җәйге ялында күңелсез вакыйгалар килеп чыкмасын өчен, хөрмәтле ата-аналар, балаларыгыз ялын ничек үткәрер, буш вакытларында нәрсә белән шөгыльләнер, шул турыда кайгырттыгызмы? Мондый сорау елның теләсә-кайсы фасылы өчен урынлы, ә җәй айлары өчен бигрәк тә.
Кечкенәләрнең шуклыгы аркасында килеп чыккан янгын сәбәпләренең анализыннан күренгәнчә, балалар еш кына күзәтүчесез калалар, ут белән сак булырга өйрәнмәгәннәр, әти-әниләре тарафыннан игътибар җитеп бетми.
Балаларны бикле ишекләр артында ялгыз калдыру бик куркыныч. Янгын булган очракта, алар өйдән чыга алмаска мөмкин. Уттан һәм төтеннән куркып, балалар гадәттә карават һәм өстәл асларына, шкафка кереп кача, һәм аларны янгын вакытында табып алу җиңел эш түгел.
Балалар еш кына коры үләнгә, ачык җирләрдә җыелып яткан тупыл мамыгына ут төртә, ташландык урыннарда, парк, урманлыкларда ут белән шаяра, ахыры ни белән бетәсен уйламый. Быел, мәсәлән, 28 апрель көнне Биектау районында коры үләнне яндырып җибәргәндә 2002 елгы малайның тәне пешә.
Тәмәке тартучы үсмерләр, гадәттә, чардаклар, сарайлар, подвалларда өлкәннәрдән качып тарта, аларның гаебе белән дә янгын очраклары булырга мөмкин. Соңгы вакытта электр приборларын сүндермичә калдыру очраклары ешайды.
Бу мисалларны китереп, Алабуга шәһәре һәм районы янгын сакчылыгы ата-аналарга балаларын игътибарсыз калдырмаска, аларның вакытларын ничек үткәрүе белән кызыксынырга, гади генә шырпының да күпме куркыныч белән янавын аңлатырга, электр приборларын дөрес куллану кагыйдәләрен өйрәтергә чакыра.
Зөлфия ПРИМАКОВА
