Алабуга нуры

Алабугада мәктәп укучыларына азык-төлек җыелмалары бирәләр

Азык-төлек җыелмасына макарон эшләнмәләре һәм ярмалар кергән.

Алабуга районында узган атна ахырында мәктәп укучыларына азык-төлек җыелмалары бирү башланды.
Билгеләп үтик, аларны мәктәп укучылары инде икенче тапкыр ала. Азык-төлек җыелмасы бу айда узган айга караганда азрак. Бу юлы аңа макарон әйберләре һәм бодай ярмасы кергән. Мәгариф идарәсендә аңлатуларынча, бу — матди ярдәм дә, түләүле туклану өчен компенсация дә түгел. Җыелмалар мәктәп туклануының айлык бәясе исәбеннән тупланган, ул җирле бюджеттан дотацияләнә, ә бу бер уку көненә 7 сум 7 тиен, ди идарә башлыгы Ривал Зарипов.
— Майда уку көннәренең саны апрель белән чагыштырганда азрак. Беренче сыйныфтан сигезенче сыйныфка кадәр укучылар 11 көн исәбеннән җыелмалар алачак, чөнки алар укуны 23 майда төгәлләде. Димәк, һәр укучыга 84 сум 70 тиен чыга. Өлкән сыйныф укучылары (9-11 сыйныфлар) 30ына кадәр укыды. Шулай итеп, аларның азык-төлек җыелмасы 17 көнгә исәпләнгән. Акчалата эквивалентта бу 130 сум 90 тиен.
Кайбер күрше шәһәрләрдән аермалы буларак — анда азык-төлек җыелмаларын социаль яклау линиясе буенча аз тәэмин ителгән кешеләр генә ала — безнең районның барлык укучылары да азык-төлек җыелмалары белән тәэмин ителәчәк. Ә бу 10 меңгә якын кеше.
6нчы мәктәп укучысының әнисе Виктория Афанасьева сүзләренә караганда, гаиләгә мондый ярдәм комачауламаячак.
— Бүген без монда кызым Вероника белән килдек. Укучылар өчен азык-төлек җыелмаларын инде икенче тапкыр алабыз. Мәктәп яшендәге ике балам бар. Ярдәм иткәннәре өчен рәхмәт.
Азык-төлек бирү вакыты турында мәгълүматны сыйныф җитәкчеләре җиткерә. Җыелмаларны таратканда коронавирус инфекциясе таралуын профилактикалауның барлык чаралары да үтәлә.
Искәртик, узган атнада Алабугада бушлай азык-төлек җыелмаларын тагын йөздән артык чернобыльче дә алды. Азык-төлек җыелмасына традицион продуктлар — ярмалар, чәй янына тәм-томнар һәм беренче чиратта кирәкле башка товарлар керде. «Ашыгыч» азык-төлек ярдәме катлаулы икътисади хәл аркасында муниципалитет тарафыннан күрсәтелде. Исегезгә төшерәбез, элегрәк, апрель-май айларында азык-төлек җыелмаларын ветераннар, ялгыз яшәүче пенсионерлар, күп балалы гаиләләр, аз тәэмин ителгән һәм авыр тормыш хәлендә калган гаиләләр алган иде.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: