Алабуганың кавалерист-кыз музее экспозициясен яңартты

Надежда Андреевна Дурованың яңартылган йорт-музее реэкспозициядән соң үз ишекләрен ачты. Бу вакыйга музейның 30 еллыгына һәм кавалерист-кызның тууына 240 ел тулуга туры китерелде.

— Ел саен туристлык сезоны башлануга без яңа нәрсә әзерләргә тырышабыз һәм быел без бу музейны яңартырга булдык. Безнеңчә, бер экспозиция ун елдан артык күрсәтелмәскә тиеш. Мин алдагы ике экспозиция авторларына бик рәхмәтле, әмма алар үз хезмәтләрен башкардылар, һәм бүген без сезне яңалык белән гаҗәпләндерергә телибез, − диде үзенең сәламләү сүзендә музей-тыюлык генераль директоры Гөлзада Руденко.

Шулай ук ул экспозицияне яңартуга бер миллион сум бүлеп биргән Татарстан Республикасы Рәисе администрациясе җитәкчесе, мәдәниятне үстерүгә ярдәм фонды директоры Әсгать Сәфәровка, «Мастер» реставрация компаниясе генераль директоры Дамир Кәримуллинга керткән өлеше өчен рәхмәт белдерде. Ул 2020 елда музей бинасын ремонтлаган партнерларны: «Махеев» хәйрия фондын һәм шәхсән Леонид Барышев һәм Вадим Махеевны, шулай ук «Спецэнергомонтаж» җәмгыятен дә билгеләп үтте.

Тантанада катнашкан район башлыгы Рөстәм Нуриев билгеләп үткәнчә, шәһәр белән бәйле тарихи шәхесләрнең исемнәре шәһәрне үстерергә, аны яхшыртырга этәргеч булып тора. Мәсәлән, быел Шишкин буаларын төзекләндерү бара, Ленин мәйданында яктырткычларны алыштыру дәвам итә, Александр бакчасындагы койма һәм башка күп нәрсәләр яңартылачак.

— Надежда Андреевна Дурова музее — минем иң яраткан музеемдыр, мөгаен. Анда интерактив күп, аның һәр квадрат метры ниндидер яңалык белән җәлеп итә, — диде ТР Дәүләт Советының мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова.

Кызыл тасма киселгәннән соң, тантанада катнашучылар яңа экспозиция белән таныша алды. Яңартылган музейда Дурованың тормыш хронологиясе сакланган. Беренче катта аның балачагы һәм яшьлеге мизгелләре, әбисе һәм бабасы янында кунак булган кече Россия почмаклары, икенче катта хезмәт белән бәйле әйберләр һәм Алабугадагы йорт интерьеры элементлары күрсәтелгән. Музейның төп яңалыгы — экскурсияне аудио- һәм видео белән озата бару, яктылык элементларын куллану. 

— Без мондый проект өчен меценатларны җәлеп итә алган хезмәттәшләребез белән бик горурланабыз. Алар кунаклар өчен заманча, кызыклы, иҗади киңлек булдыра алган, − диде шушы көннәрдә командасы белән Алабугада булган Соликамск шәһәр округының мәдәният идарәсе башлыгы Ольга Ершова.