Алабуга нуры

Дамир Фәттахов яшьләр сәясәтенең федераль стандартын булдырырга тәкъдим итте

Аерым алганда, норматив барлыкка килү яшьләр учреждениеләре хезмәткәрләренең хезмәт хакын ел саен индексацияләү мөмкинлеге бирәчәк.

Федераль дәрәҗәдә дәүләт яшьләр сәясәте стандартын эшләү өчен эшче төркем булдырырга кирәк. Казанда узган Яшьләр Халыкара конгрессында шундый инициатива белән Татарстан Яшьләр эшләре, спорт һәм туризм министры Дамир Фәттахов чыгыш ясады. Бу хакта «Татар-информ» мәгълүмат агентлыгы хәбәр итә.


«Федераль дәрәҗәдә яшьләр учреждениеләре һәм аларның номенклатурасын регламентлаучы стандарт кирәк. Без көн саен яшьләр сәясәтенә ярдәм итәргә әзер булган, әмма норматив документлар сораган башка министрлыкларда эшләгән хезмәттәшләр белән авыр диалоглар алып барабыз», — дип билгеләп үтте министр.

 


Фәттахов ассызыклап үткәнчә, Татарстанда стандарт инде эшләнгән һәм теләсә кайсы очракта да 2022 елның 1 гыйнварына кадәр гамәлдә булачак, әмма ул бөтен ил буйлап таралачакмы дигән сорау туа. Стандартны кертү яшьләр сәясәте учреждениесен оптимальләштерүдән саклап калырга мөмкинлек бирәчәк. Алар шулай ук үз биналарын ремонтлау өчен өстәмә финанслау ала алачаклар.


Моннан тыш, мондый документ ел саен яшьләр оешмалары хезмәткәрләренә хезмәт хакын индексацияләргә мөмкинлек бирәчәк. Татарстанда бу инде бара, әмма тиешле система республика дәрәҗәсендә Татарстан Республикасы Президенты Рөстәм Миңнеханов карары белән гамәлгә ашырыла.


Фәттахов сүзләренә караганда, эшче төркемне яшьләр сәясәте һәм социология өлкәсендәге галимнәрдән, белгечләрдән формалаштыру планлаштырыла. «Без бу стандартны яшьләр оешмаларының барлык хезмәткәрләре, шулай ук илебезнең һәр яшь кешесе тормышында чагылыш табачагына ышанабыз», — дип өстәде ул.
ТР Яшьләр эшләре, спорт һәм туризм министрлыгы башлыгының инициативасын Татарстаннан РФ Дәүләт Думасы депутаты Марат Бариев хуплады. «Без инде күптән яшьләр сәясәте стандарты турында сөйләшәбез. Һәм Татарстан бу идеяне актив рәвештә алга этәрә. Эмоцияләр һәм башкалардан тыш, эш өчен кирәкле атрибутлар да бар. Стандарт дәүләт дәрәҗәсендә тотрыклылык булсын һәм даими финанслау өчен кирәк. Бу бер елга алдан планлаштырырга мөмкинлек бирәчәк», — дип белдерде парламентарий.


Стандартны булдыру Россиядә яшьләр сәясәтен гамәлгә ашыру кирәклеген расларга мөмкинлек бирәчәк, дип нәтиҗә ясады Бариев.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: