ТКХ өчен түләмәүчеләрне махсус торак фондка күчерү тәкъдим ителә
2012 нче елның 1 июненә булган мәгълүматлардан күренгәнчә, халыктан торак-коммуналь хезмәтләр өчен түләүләр җыемы 97,2 процентны тәшкил итә. Ел башыннан халыкның ТКХ өчен вакытында түләмәве нәтиҗәсендә бурыч 293 миллион сумга артып, 1 нче июньгә 3 миллиард 365 миллион сумны тәшкил иткән. Бу хакта бүген ТР Министрлар Кабинетында Татарстан Президенты Рөстәм Миңнеханов катнашында узган "Татарстан Республикасында 2011-2012 елгы ягу сезонында ягулык-энергетика һәм торак-коммуналь хуҗалык оешмалары эше нәтиҗәләре һәм 2012-2013 нче елгы ягу сезонына әзерлек буенча бурычлар" темасына утырышта төп доклад белән чыгыш ясаган ТР Төзелеш, архитектура һәм торак-коммуналь хуҗалык министры Ирек Фәйзуллин хәбәр итте.
Министр ассызыклап узганча, торак-коммуналь хезмәтләр өчен халыктан акчалар җыемы күләмен арттыру, бурычларны түләттерү максаты белән, идарә итүче компанияләрнең суд приставлары, бурычларны түләттерү буенча коллектор агентлыклары белән эшен катгыйландыру, әҗәтлеләрне күчерү өчен махсус торак фондны булдыру зарур.
Торак-коммуналь комплексының үз вазифаларын тиешенчә үтәвендә, ягу сезонына әзерлек кысаларындагы чараларның тиешенчә үтәлешендә, торак-коммуналь хезмәтләр өчен вакытында түләү хәлиткеч роль уный. Ирек Фәйзуллин хәбәр иткәнчә, кайбер муниципаль берәмлекләрнең халык белән бу мәсьәләдә эше җитенкерәми, мисал итеп, Югары Ослан, Мамадыш Питрәч, Алексеевски һәм башка районнарны китерергә була.
1 июньгә булган мәгълүматлардан күренгәнчә, торак-коммуналь хуҗалык оешмаларының, сарыф ителгән газ өчен бурычы 797 миллион сум күләмендә. Газ өчен бурычларның саллы өлеше Яшел Үзән, Алабуга, Лениногорски, Бөгелмә районнарына, Казанга туры килә.
"Торак-коммуналь хезмәтләр өчен халык түләгән акчаларның, идарә итүче компаниядән - ресурслар белән тәэмин итү оешмаларына, ә алардан газ һәм электр энергиясе поставщикларына хәрәкәтенең үтә күренмәлелеген тәэмин итү максатларында, бердәм исәп-хисап үзәген (ЕРЦ) булдыру турында карар кабул ителде. Бердәм исәп-хисап үзәкләре республиканың 45 муниципаль районында теркәлгән", - дип белдерде Ирек Фәйзуллин.
Рөстәм Миңнеханов чыгыш тәмамланганнан соң, ни өчен һәр муниципаль районнарда бердәм исәп-хисап үзәге эше тиешенчә оештырылмавы белән кызыксынды. "Бу бит коррупция чагылышы. Ни өчен килешүләр буенча төрле җирдә төрлечә фикер йөри", - ди ул. Ирек Фәйзуллин аңлатып узганча, бердәм исәп-хисап үзәкләре, ресурслар белән тәэмин итү оешмаларының халыктан килгән акчалар хәрәкәте динамикасын күзәтеп торуы өчен кирәк. Әгерҗе, Азнакай, Яшел Үзән, Мамадыш, Түбән Кама һәм башка бик күп районнарда бу юнәлештәге эш әлегә төгәлләнмәгән. Авылларда бу мәсьәлә алай ук кискен тормый.
"Бәлки безнең рекомендацияләр дөрес түгелдер?", - дип мөрәҗәгать итте Президент. "Алай булса, әлеге карарның ялгышлыгын расласыннар. Муниципаль берәмлекләр президиум утырышын җыеп, дөрес түгел дип әйтсен. Бердәм исәп-хисап үзәкләре үзе алучы комиссия хисабына яши. Әлеге акчалар белән идарә итү кемнең башына килә ала? Бу безнең акча түгел һәм аңа беркемнең дә кагылырга хакы юк. Бу эшкә нокта куярга вакыт. Аңлашылмаган мәсьәләләр булса, төшенергә 15 көн вакыт бирәм. Әгәр дә вакыт таләп ителми икән, документларны прокуратурага тапшырырга кирәк, коррупция булу-булмауга тикшерсеннәр. Торак-коммуналь хуҗалык хезмәтләре поставщигы үз акчасын тулысынча алырга тиеш. Безнең бурыч - ТКХ хезмәтләре поставщиклары мәнфәгатьләрен кайгырту", - дип басым ясады Рөстәм Миңнеханов.
"Татар-информ"
Иң мөһим һәм кызыклы язмаларны Татмедиа Telegram-каналында укыгыз
