«Адымнар-Алабуга» мәктәбендә педагоглар полилингваль укыту үзенчәлекләре турында фикер алыштылар

Яңа уку елы алдыннан «Адымнар-Алабуга» полилингваль мәктәбендә полилингваль белем бирү концепциясен гамәлгә ашыру буенча семинарлар циклы башланды. Бу хакта район башкарма комитеты җитәкчесенең социаль мәсьәләләр буенча урынбасары Лилия Ягудина хәбәр итте.
Циклны ачып җибәргән беренче семинарның темасы — белем бирү мохитен булдыру. Анда педагоглар мәктәптә балаларны инглиз, татар һәм рус телләренә мәгълүмати укытуның ничек алып барылырга тиешлеге турында фикер алышты. Телләргә өйрәтү дәрестән тыш вакытта да гамәлгә ашырылсын өчен укытучыларга нәрсә эшләргә кирәклеге турында сөйләштеләр.
«Сентябрь аенда шундый өч семинар узар дип планлаштырабыз, алга таба алар ай саен узачак. Барысы да полилингваль белем бирү концепциясен тормышка ашыруга багышланачак, чөнки бу тема, һичшиксез, безнең республика өчен әле яңа», — дип билгеләп үтте Лилия Ягудина.
Семинар барышында педагоглар тәкъдимнәр исемлеген төзү, ә аннары аларны хезмәттәшләренә өч телдә — рус, татар һәм инглиз телләрендә тәкъдим итү өчен төркемнәргә бүленде. Иң уңышлы тәкъдимнәр киләчәктә полилингваль белем бирү процессында гамәлгә ашырылачак.