Алабуга политехника көллияте базасында авыл хуҗалыгы өчен кадрлар әзерләү буенча махсус юнәлеш булдыру планлаштырыла

Алабуга районы башлыгы урынбасары Олег Колпаков һәм «Аммоний Агротехнологии» ҖЧҖ директоры Александр Мананкин Алабуга политехника көллиятендә булды. Көллият директоры Светлана Соколова һәм мөгаллимнәр остаханәләр һәм уку классларын күрсәтте, укыту үзенчәлекләре турында сөйләде.

«Аммоний Агротехнологии» — безнең районда җирдән файдаланучы иң эре компанияләрнең берсе. Ул 1000 баш савым сыерга исәпләнгән сөт-товар фермасы төзергә ниятли, проектлаштыру киләсе елда башланачак. 2023 елда объектны файдалануга тапшыру планлаштырыла. Икенче проект орлык заводы төзүне күздә тота.

— Бүгенге көндә без Менделеевск һәм Алабуга муниципаль районнары территориясендә авыл хуҗалыгы товар җитештерүчеләре булып торабыз, шул ук вакытта без Алабуга районы территориясендә мәйданнарны арттыру ягында. Шулай итеп, 5 мең гектардан артык җирне файдалануга алырга ниятлибез, һәм, әлбәттә, бу юнәлешне, үсемлекчелекне, терлекчелек тармагын үстерүне күздә тотабыз. Әлеге проектны тормышка ашыру өчен белгечләр һәм эшче кадрлар кирәк, — ди Александр Мананкин.
Авыл тармагы өчен белгечләр әзерләү мәсьәләсе район башлыгы Рөстәм Нуриевның аерым контролендә.

— Үсемлекчелек, терлекчелек буенча күрсәткечләр үсәр дип өметләнәбез. Шушы максат белән без кадрлар әзерләү, Мурзиха авыл җирлегендә матди-техник база булдыру мәсьәләләре буенча фикер алыштык. Рөстәм Мидхәт улы моны якындагы елларда тормышка ашыру өчен зур көч куя. Бу заманча техника, җиһазлар белән җиһазландырылган заманча укыту үзәге булачак, анда белем алучылар авыл хуҗалыгы предприятиеләрендә практика узачак, — дип сөйләде Олег Колпаков.

Яңа юнәлешне инде киләсе уку елында ук оештырырга планлаштыралар. Максатчан программа буенча 25 кеше тупланачак. Аннары алар эре авыл хуҗалыгы предприятиеләренә җибәреләчәк.

— Уку йортының дәрәҗәсе югары, кыйммәтле заманча җиһазлар белән җиһазландырылган, күрәсең, моны үз эшчәнлекләрендә кызыксынган кешеләр оештырган һәм, кагыйдә буларак, моннан кызыксынучан, максатчан белгечләр чыга. Алар бу мохиттә үсә һәм нәрсәгә омтылырга кирәклеген күрә. Без көллият белән хезмәттәшлек итә һәм монда уңышлы кадрларны таба алачакбыз, — диде «Аммоний Агротехнологии» ҖЧҖ директоры.

Александр Мананкин билгеләп үткәнчә, авыл хуҗалыгында кадрлар белән хәл бик кискен. Авыл хуҗалыгы предприятиеләрендә эшләүче белгечләрнең шактые урта һәм пенсия алды яшендә. Алар янында эшләп тәҗрибә тупларга, ә алга таба алмашчылары булырга белемле яшь кадрлар бик кирәк. Шуңа күрә авыл хуҗалыгы өчен кадрлар әзерләү буенча махсус юнәлеш булдыру һәрвакыт актуаль.

Сүз уңаеннан, Олег Колпаков хәбәр иткәнчә, районга инвестор сыйфатында «Камский Бекон» киләчәк, бу — Татарстан Республикасында дуңгыз ите җитештерүче иң эре компания.

Фотода:
Олег Колпаков һәм Александр Мананкин Политехника көллиятенең остаханәләрен һәм уку классларын карады.