Алабуга районында юллар төзекләнә

Төзекләндерү һәм яшелләндерү идарәсе башлыгы Валерий Исаев сөйләвенчә, "салкын асфальт"тан башладылар, кичәдән бирле "кайнар асфальт"ка күчтеләр, аны "Алексеевскдорстрой“дан китерәләр. 

− Без барлык юлларны тиешле торышка җиткерәчәкбез, − диде ул.
Бер атна элек район юлларында да чокыр-чакырларны ямауга керештеләр. 2020 елдан алып, моның белән “Алексеевскдорстрой” оешмасы шөгыльләнә. Алар җаваплылыгында − Алабуга районындагы 232 километр төбәк юллары — алар 17 авыл җирлегенә керә.

− Хәзер без юлны тоташ асфальтлы-бетонлы катнашма белән ябабыз, чөнки һава торышы җылы. Пәнҗешәмбедә асфальт-бетон заводын эшләтеп җибәрдек һәм җомгадан эш башладык. Былтыр 900 тонна катнашма китте, быел да шул чама булыр. Кайнар асфальтлы-бетон салу белән беррәттән, сиптергечле яңа ысул да кулланабыз. Чокырлы урыннарны ямау ул күп акча һәм хезмәт таләп итә. Яңа ысулны көннең җылылыгы 20 градустан арткач кына файдаланырга мөмкин, − ди "Алексеевскдорстрой“ның Алабуга участогы башлыгы Динар Җаббаров. 

Аның сүзләренә караганда, юлның башыннан өченче километрына кадәр “Алабуга — Лекарево — Армалы” арасы иң проблемалы булып тора. Район юлларын ремонтлауны шуннан башлаганнар да инде. 

Быел юлларны төзекләндерүгә, яңа билгеләр куюга, автопавильоннар урнаштыруга, юл кырларын чабуга зур игътибар биреләчәк. 

− Юл өслегендәге билгеләрне тулысынча алыштырачакбыз, алар ике ел элек салынган иде. “Куркынычсыз һәм сыйфатлы юллар” илкүләм проекты буенча шулай ук “Алабуга — Гари — Абалач” юлының 1енче километрыннан 3енче километрына кадәр ремонт ясалачак, − дип өстәде Динар Җаббаров.