Алабуга сәламәтлек саклау ветераннарына санаторийга путевкалар тапшырдылар

Кичә 65 яшьтән өлкәнрәк һәм коронавирус белән авырган сәламәтлек саклау оешмаларының амбулатор-сырхауханә челтәрендә эшләүче хезмәткәрләргә реабилитация юлламаларын тантаналы тапшыру булды. Юлламаларны тапшыру ТР Дәүләт Советының «Мәрхәмәт-Милосердие» хатын-кыз депутатлар берләшмәсенең республика муниципаль берәмлекләре белән видеоконференция режимында узды.

ТР Сәламәтлек саклау министрлыгы мәгълүматларына караганда, юлламалар «Рәхмәт, доктор!» акциясе кысаларында республиканың 17 төбәгеннән 44 медицина хезмәткәре алды. Алар арасында Алабуга районыннан рентген кабинеты лаборанткасы Валентина Белавина һәм район үзәк хастаханәсе гомуми практика табибы Азал Сабирҗанов та бар.

Валентина Павловнаның медицина стажы — 50 ел, шуларның 33е рентген лабораториядә эшли. Өлкән яшьтә булуга карамастан, ул пандемия вакытында да, хәзер дә үз хезмәттәшләре белән беррәттән эшләвен дәвам итә. Узган елның декабрендә ул коронавирус инфекциясе белән авырый. Алданрак бер билгесе булмаса да, авыруны бик авыр кичердем, ди Валентина Павловна.

Азал Миңнехан улы Алабуганың сәламәтлек саклау системасында 43 ел эшли, шуларның 34е — Алабуга үзәк район хастаханәсендә. Валентина Павловна кебек үк, узган елның җәендә коронавирус белән авырый. Пандемия кимүгә карамастан, барлык саклык чараларын үтәргә кирәк, дип киңәш итә табиб.

Һәр медицина хезмәткәре үзе барырга теләгән шифаханәне сайлаган. Валентина Павловна һәм Азал Миңнеханович «Шифалы су — Ижминводы» шифаханәсен сайлады. Анда алар ял итәчәк һәм җиде көн дәвамында кирәкле процедуралар алачак.