Алабугада Чулпан Билалова күргәзмәсе эшли

Заманча этносәнгать музеенда башкорт рәссамы Чулпан Билалованың күргәзмәсе эшли.

Биредә 54 сәнгатьле картина һәм график эшләр, шулай ук иллюстрацияләр куелган.

− Бу күргәзмәдә булып, безнең кунаклар чыннан да җанга гаять олы яктылык һәм өмет ала. Чулпан — беренче чиратта, хатын-кыз күңелен аңлаучы рәссам. Бу илһам чыганагы саекмасын дип телим, − диде Алабуга дәүләт музей-ядкарьлегенең генераль директоры Гөлзада Руденко. 

Әйтергә кирәк, Чулпан Билалова төбәк, бөтенроссия, халыкара арт-проектларда һәм Алабуга дәүләт музей-ядкарьлеге үткәргәннәрендә дә актив катнаша. 2012 елдан заманча этносәнгать буенча халыкара арт-симпозиумнарда катнаша. Рәссам күп төрле жанрларда иҗат итә, төрле ысуллар белән, пумала һәм карандашны оста кулланып иҗат итә. 

− Бу эшләр бернинди дә борчу тудырмый, киресенчә, тарихка чумасың. Аларда иң мөһиме — йолаларның саклануы. Һәрбер эш турында озаклап сөйләргә мөмкин. Әлеге картиналарга карыйсың да, кояш ныграк яктырган сыман, − диде «Яңарыш» фондының башкарма директоры Зөлфия Сөнгатуллина.

Күргәзмә авторы әйләнә-тирә һәм табигать күренешләреннән, кешеләрнең кичерешләреннән, төс кушылмаларыннан илһам ала. Рәссам бизәүче буларак та танылган — ул 700дән артык әсәргә иллюстрацияләр ясаган. Эшләренең күп өлеше хосусый коллекцияләрдә Италиядә, Германиядә, Португалиядә, Сербиядә, Франциядә һәм башка илләрдә саклана. Алабуга мирасханәсе фондларында аның 17 эше бар. 

− Шундый танылган диварларыгызны, эшләремне урнаштырырга булышып, миңа ышануыгыз өчен рәхмәтлемен. Минем өчен бу зур мәртәбә, рәхмәт сезгә! Эшләремне карап, рәхәтлек алуыгызны телим, − диде Чулпан Билалова күргәзмә кунакларына.