Алабугада Ленинград блокадасы шаһиты Владимир Громов тавыш бирде

Владимир Сергеевич мәдәният көллияте бинасында сайлау участогында гражданлык бурычын үтәде. Ветеран сүзләренчә, сайлауларда һичшиксез катнашырга кирәк, чөнки киләчәк безнең сайлауга бәйле булырга мөмкин. Читтә калырга ярамый.

Владимир Громов соңгы җиде елда Алабугада яши. Район хакимиятенең шәһәрнең тарихи өлешен реконструкцияләү, Шишкин буаларын төзекләндерү эшләреннән бик канәгать булуын әйтә.

Владимир Сергеевич өч яшьлек малай чагында әнисе белән блокадалы Ленинградтан тормыш юлы буйлап Түбән Тагилга барганын хәтерли. Хәзер ул балачагына туры килгән сугыш еллары, милиция мәктәбендә хезмәт итүе турында мәктәп укучыларына, курсантларга, студентларга, Хәтер музеена килүчеләргә сөйли. Ветеран җырларга ярата һәм җирле ансамбльдә рәхәтләнеп чыгыш ясый.