Алабугада урам утларын алыштыру эшләре дәвам итә

Һава электр тапшыру линияләрен җир асты кабель линияләренә күчерәләр, шулай ук урам яктырткычлары алыштырыла.
— Без Нефтьчеләр проспектын яктырту буенча масштаблы программаны башладык, линиянең озынлыгы 5 километр. Бу эшләрнең якынча бәясе 18-20 миллион сум тәшкил итә, эшләр өч этапка бүленгән. 1,5 чакрым озынлыктагы беренчесе яз көне тәмамланды, августта без икенче этапны тәмамладык, хәзерге вакытта «Барс» төзелеш компаниясе подрядчысы тарафыннан эшләрнең өченче этабы башкарыла. Юл картасы буенча Нефтьчеләр проспектында барлык яктырту системасы 10-15 октябрьгә кадәр алыштырылырга тиеш, — дип сөйләде район башкарма комитеты җитәкчесе вазифаларын башкаручы Ленар Нургаянов. 
Шул ук вакытка Яр Чаллы шоссесы буенча эшләр тәмамланачак, ул "УкупрПласт"ка кадәр булачак. Хәзер юлның бу өлеше берничек тә яктыртылмаган һәм алабугалылар бу проблеманы күптән хәл итүне сораганнар иде. Юл фонды программасы буенча 3 километрга якын юл яктыртылачак. Анда яктырту баганалары урнаштырылачак, һәм кабель җир астыннан үткәреләчәк, ул Әйләнеч шоссе ягыннан шәһәргә керү юлындагы яктырту системасы белән охшаш булачак.
Ленин мәйданы турында да аерым әйтеп үтәргә кирәк.
— Анда бераз төзәтмәләр кертелә — объектта комплектлы трансформатор подстанциясе (КТП) сүтелә. Хәзер Челтәр компаниясе әлеге линияне яңа КТПга тоташтыра. Эшләрне атна дәвамында тәмамлау планлаштырыла, — диде Ленар Нургаянов.