Алабугада Яшьләр чыршысын ачу тантанасы үтте

Яңа ел бәйрәме 27 декабрьдә яңартылган Ленин мәйданында узды. Иң шаян һәм актив алабугалылар өчен күңел ачу программасын «Барс» Яшьләр үзәге әзерләде. Чыршы кунаклары өчен төрле уен мәйданчыклары, күңелле стартлар, мини-хоккей, бәйге, викториналар оештырылды. Кыш Бабай һәм Кар кызы Яңа ел мохите тудырдылар. Мишка һәм Барсик исемле буйлы курчаклар барлык җыелучыларның күңелен ачты.
Катнашучылар өчен фотозона, аттракционнар һәм Раштуа йортлары эшләде, анда чәй эчәргә һәм шашлык ашарга була иде.
Барлык алабугалыларны бәйрәм белән район башлыгы Рөстәм Нуриев котлады.
— Быел без шәһәрне яңача бизәргә тырыштык һәм киләчәктә шәһәребез тагын да яктырак балкыр дип өметләнәбез, — дип билгеләп үтте ул үз чыгышында.
Шул ук көнне район башлыгы төп сәхнәдә шәһәр тормышында актив катнашкан студентларга исемле стипендияләр тапшырды.
Алабуга мәдәният һәм сәнгать көллияте студенты Виктория Лазарчук, Алабуга медицина училищесы студенты Анастасия Заика һәм җирле «Полигон» иҗтимагый оешмасы, «Алабуга скаутлары» отряды әгъзасы Даниил Локтев район башлыгы стипендиясенә сертификатлар алдылар. Быел бөтен ил буенча волонтерлык хәрәкәтенең актуальлеге билгеләп үтелде. Мәсәлән, Мәдәният һәм сәнгать көллиятендә волонтерларны Виктория Лазарчук координацияли, һәм стипендияне билгеләү буенча сайлап алу комиссиясе тарафыннан әлеге эшчәнлекнең әһәмияте бәяләнде.