Алабугага мәшһүр алып баручы, язучы Павел Любимцев килде

Алабуга дәүләт музей-ядкәрлегенә театр һәм кино актеры, теле- һәм радиотапшырулар алып баручы, язучы Павел Любимцев килеп китте.

Ул - Россия Федерациясенең атказанган артисты, атказанган сәнгать эшлеклесе һәм мәдәният өлкәсендә РФ Хөкүмәте премиясе лауреаты. "Живые новости", "Путешествие натуралиста", "Городское путешествие" һәм "Занимательные истории с Павлом Любимцевым" кебек мәшһүр телепрограммалар буенча ул күпләргә таныш.

Алабугада Павел Евгеньевич музей-ядкәрлек генераль директоры Гөлзада Руденко белән очрашты, Иван Шишкин музей-йортында, Надежда Дурованың утар-музеенда, Марина Цветаеваның истәлек йортында һәм "Трактир" музей-театрында булды. Алабуга музей-ядкәрлеге музейларын карап йөргән вакытта Павел Любимцев үзенең "Городское путешествие" программасын төшерүе шундый кызыклы урында булмавына бик нык үкенүен белдерде. Алабугага ул камералы оркестр җитәкчесе Игорь Лерман белән килгән иде.