Алабуганың балалар сәламәтләндерү лагерьларында 110 бала ял итә

Район башкарма комитеты җитәкчесенең социаль мәсьәләләр буенча урынбасары Лилия Ягудина хәбәр иткәнчә, җәйге сәламәтләндерү кампаниясе башлануның үзгәртелгән срокларын исәпкә алып, 2020 елның җәендә Алабуга районында оештырылган ял формалары белән 880 кеше тәэмин ителәчәк (башлангыч җәйге план — 3920 кеше). 385 кеше стационар сәламәтләндерү лагерьларында ял итә алачак, шулай ук авыр тормыш хәлендә калган гаиләләрдән 270 бала (ТР Яшьләр министрлыгы квоталары буенча) һәм КФУның Алабуга институтының «Буревестник» студентлар савыктыру лагеренда 225 кеше.
«Яшь төзүче» 21 көнлек ике смена һәм август аенда 7 көнлек профильле смена уздырачак. «Урман әкияте» 18 көнлек өч смена дәвамында 120 спортчыны кабул итәчәк: анда интернет, гаджетлар булмаячак, балалар табигатьтә күнегүләр белән мәшгуль булачак. «Буревестник»ка 1 июльдән 12 көнгә «Җәйге кибернетика мәктәбенә» 81 кеше кергән. Шуны билгеләп үтәргә кирәк, «Космос» санатор-сәламәтләндерү комплексы сәламәтләндерү кампаниясен гамәлдән чыгарды. Моннан тыш, Татарстан Республикасы балалар һәм яшьләрнең ялын оештыру буенча ведомствоара комиссия карары белән әлегә көндезге ял һәм палатка лагерьлары бетерелгән, хезмәт һәм ял лагерьлары 2020 елның көз-кышына күчерелгән. 
«Яңа коронавирус инфекциясе таралуга бәйле вәзгыятьне исәпкә алып, быел санитар-эпидемиологик хәлнең бездән балаларның ялын һәм сәламәтләндерүен оештырганда аерым игътибар таләп итүен аңлыйбыз», — дип шәрехләде Лилия Ягудина.
Билгеләп үтик, быел лагерь сменалары ябык, шул исәптән әти-әниләр өчен дә. Барлык дәресләр, мастер-класслар, отряд чаралары бары тик лагерь территориясендә генә уза. Әлбәттә, барлык саклык чаралары да үтәлә. Лагерь хезмәткәрләре коронавируска тест үткән, шәхси саклану чаралары белән тәэмин ителгән; 6 контактсыз термометр, 7 ябык типтагы бактерицид нурландыргыч сатып алынган, көненә өч тапкыр балалар һәм персоналның температурасын үлчәү башкарыла. Без «Яшь төзүче» лагере сменасы начальнигы Наталья Немтырева белән аралаштык. Ул чараларның ничек узуы турында сөйләде. 
«Билгеле бер чикләүләр бар, әлбәттә, аларны без үтибез. Тик шул ук вакытта балалар артык чикләнмәгән. Алар лагерь сменасының барлык көндәлек чараларында, мастер-классларда һәм квест-уеннарда катнаша. Әйтик, кичен бездә — «Яңача әкият», ә иртән — «Хәзинә эзләүчеләр». Һәр балага шәхси якын килү оештырылган. Дәресләрне экологик, патриотик, эстетик, физик тәрбия бирү кысаларында үткәрәбез. Иҗади сәләтләрен үстерәбез. Үзәк китапханә белән онлайн режимында тыгыз элемтәдә торабыз, анда үткәрелгән рәсем конкурсында катнашабыз», — ди Наталья Немтырева.