Алабуганың Шишкин буаларында суга батудан коткарылган балаларның хәле билгеле булды

Шишкин буаларында суга батудан коткарылган кызлар хәзерге вакытта хастаханәдә дәвалана. Алар табиблар күзәтүе астында, сәламәтлекләре канәгатьләнерлек дип бәяләнә. Җомга көнне аларны хастаханәдән чыгарырга тиешләр. Бу хакта безнең хәбәрчегә ТР Гадәттән тыш хәлләр министрлыгының Алабуга муниципаль районы буенча идарәсе башлыгы Николай Доронин хәбәр итте. 

Элегрәк без вакыйганың узган дүшәмбедә булуы турында хәбәр иткән идек. Ике кыз суга төшеп, бата башлый. Бәхеткә, янәшәдә Ленар Дәүләтшин, аның хатыны Бриллиант һәм туганының улы Артур Шәрәфетдинов булып чыга. Алар балаларны судан коткара.