Алабуганың 6 нчы мәктәбендә ватанпәрвәрлек сорауларына кагылышлы семинар узды

6 нчы мәктәпнең актлар залында җомга көнне кызу бәхәс атмосферасы хөкем сөрде, бирегә лекторлар төркемнәре, мәгариф учреждениеләренең беренчел ветеран оешмалары рәисләре, мәгариф учреждениеләренең тәрбия эшләре буенча директор урынбасарлары, тарих укытучылары һәм мәктәп музейлары җитәкчеләре җыелды.

Семинарда катнашучыларны АМР башкарма комитеты җитәкчесенең социаль үсеш буенча урынбасары Елена Мерзон һәм АМР ветераннар советы рәисе Геннадий Баганов сәламләде.

— Без Россия казанышлары белән горурланучы, Бөек Ватан сугышы тарихын белүче, Җиңүнең нинди көчләр һәм корбаннар белән бирелгәнен, үз шәһәрен, үз гаиләсен яратучы буынны үстерергә омтылырга тиешбез, — диде Елена Ефимовна.

Геннадий Баганов үз чыгышында лекторлар төркемнәренең яшь буынны патриотик тәрбияләүдә зур роль уйнауларын тагын бер кат искә төшерде.
Бүген мәктәптә патриотик тәрбиягә юнәлдерелгән зур эш алып барыла. Һәм бу формальлек кенә түгел, ә балаларда үз иле, аның тарихы һәм мәдәнияте өчен горурлык хисе формалаштырырга чын күңелдән омтылу. Аерым игътибарны мәктәптәге һәр сыйныф бүлмәсенең Советлар Союзы Герое исемен йөртүе җәлеп итә — барлыгы алар монда 29.

Мәктәптә алып барыла торган эшләр турында мәктәп директоры Татьяна Хайдукова, тарих һәм җәмгыять белеме укытучысы Ирина Гурьева сөйләде. Ирина Викторовна укучыларда үз иле өчен горурлык хисе, тарихка һәм мәдәнияткә хөрмәт, шулай ук актив гражданлык позициясе формалаштыруда мәктәп музееның уникаль ролен ассызыклады.

Утырыштан соң барлык катнашучылар мәктәптә оештырылган интерактив күргәзмәгә юнәлделәр. Уку планы нигезендә, мәктәптә проект эшчәнлеге курсы гамәлгә ашырыла, аның кысаларында балалар үз проектларын төзи һәм яклый ала. Музейның барлыкка килү тарихы турында тарих укытучысы Ольга Бурдина һәм балалар үзләре җентекләбрәк сөйләделәр.

— Бу ел юбилей датасы — халкыбызның Бөек Ватан сугышында Җиңүенең 80 еллыгы белән истәлекле булганлыктан, Брест крепостенең макетын булдыру турында фикер туды. Бу ныгытма фашист гаскәрләренең беренче максаты була. Бер айдан артык Вермахт ныгытманы штурмларга тырышып карый. Немецлар корылманы бер тәүлек эчендә алырга ниятләгәннәр, — «Брест крепосте» темасына 10А сыйныф укучысы Ульяна Миронова үзенең проект эшен тәкъдим итте.

6 нчы мәктәптә узган семинар тарихи хәтерне саклауның һәм аны яңа буынга тапшыруның мөһимлеген ачык күрсәтә.