Алабуганың балалар китапханәсе сәламәтлек мөмкинлекләре чикле балалар белән эшләү өчен махсус грант алды

Алабуганың балалар китапханәсендә Татарстан Республикасы Хөкүмәте грантын откан иҗади проектны тәкъдир итү кичәсе узды.

Грант 2023 елның апрелендә игълан ителә. Нәкъ шул вакытта 3 нче балалар китапханәсе мөдире Ирина Резвякова беренче чиратта сәламәтлек мөмкинлекләре чикләнгән балаларга исәпләнгән иҗади проектны гамәлгә ашырырга карар итә.

— Без балаларны ата-аналар белән бергәләп укуга җәлеп итүгә юнәлдерелгән иҗади проект эшләдек һәм грантны алуга гариза җибәрдек. Шулай итеп, «Китапханә эше» номинациясендә җиңүгә ирештек, — дип сөйли Ирина Резвякова.

Җиңү нәтиҗәсендә балалар китапханәсе 150 мең сум акча ала. Бу акчага проектны алга таба гамәлгә ашыру өчен барлык кирәкле әйберләр алынган.

— Без 2 ноутбук сатып алдык, аларны безнең укучыларыбыз һәм китапханә хезмәткәрләре куллана алачак, мәсәлән, җәйге вакытта, күп кенә чаралар саф һавада үткәрелгәндә. Шулай ук 33 өстәл уены сатып алынды, алар балаларда логик фикерләүне үстерүгә мөмкинлек бирә. Һәм, әлбәттә, 110 данә китап сатып алдык, алар арасында балалар өчен генә түгел, ә өлкәннәр өчен психология буенча басмалар да бар. Чөнки безнең проектның максаты — балаларны укуга җәлеп итү өчен «китапханә — ата-ана — балалар» чылбырын булдыру, — дип билгеләп үтә балалар китапханәсе мөдире.

Бу уңайдан китапханәдә иҗади проектның презентациясе узды, анда Ирина Резвякова «Астра» тернәкләндерү үзәге һәм «Барс» яшьләр үзәгеннән килгән партнерларга сатып алынган китапларны һәм уеннарны тәкъдим итте.

— Биредә балаларга киеренкелектән арынырга, ял итәргә мөмкинлек бирүче тактиль китаплар бик күп. Дөнья төзелеше һәм кешелекнең мөһим уйлап табулары турында китаплар, матур, ачык төсләрдәге рәсем-бизәкләр төшерелгән басмалар да шактый. Уеннарга килгәндә, яңа алынган конструктор инде яшь кунакларыбызның игътибарын җәлеп итеп өлгерде, шулай ук без махсус массаж келәме сатып алдык, анда балалар ял итә алачак, — ди Ирина Резвякова.

Хәзер балалар китапханәсе — уку киңлеге генә түгел, ә балалар һәм ата-аналарның үзара бәйләнеше урыны да. Бирегә теләгән һәркем килә ала. Китапханә кунаклары өчен хезмәткәрләр яңа җиһазларны кулланып яңа чаралар әзерлиячәк.