Чаллыда зарядкада калдырылган ноутбук аркасында балалар бакчасында янгын чыккан

Узган төндә Чаллыда балалар бакчасы янды, дип хәбәр итә "Татар-информ" матбугат агентлыгы.

Бүген төнге беренче яртыда Чаллыдагы Сөембикә проспектында урнашкан «Каенкай» балалар бакчасында янгын сигнализациясе эшләү турында хәбәр килде. 
Соңыннан билгеле булганча, бинаның икенче катындагы уен бүлмәсендә кәгазь янган. 

Янгын мәйданы 5 кв. метр тәшкил иткән. Янгын сүндерүчеләргә утны сүндерү өчен биш минут вакыт таләп ителә. Зыян күрүчеләр юк. 
Алдан ачыкланганча, янгын электр җиһазларын урнаштыру һәм эксплуатацияләү кагыйдәләрен бозу нәтиҗәсендә барлыкка килгән.

ТР Гадәттән тыш хәлләр министрлыгы матбугат хезмәтендә сөйләүләренчә, балалар бакчасы бинасын тикшергәндә янып беткән ноутбук табылган. Җайланманы төнгә зарядкада калдырган булганнар. Фаразланганча, янгын шуның аркасында чыгарга мөмкин булган.

Янгынның төгәл сәбәбен әле ачыкланачак.