«Мин әтине бик яратам»

Олы бәйрәм — Ватанны саклаучылар көне. Кадерле әтиләр, дәү әтиләр һәм аларга алмашка үсүче егетләребез, ихлас күңелдән сезне бәйрәмегез белән котлыйбыз! Һәркайсыгызга сәламәтлек, бәхет, гаилә учакларыгызны сүндермичә, муллыкта яшәвегезне телибез. Әтиләр — безнең яклаучыбыз да, саклаучыбыз да, таянычыбыз да. Бүген әтиләр бәйрәме. Җир йөзендә һәрбер бала әти диеп әйтсен, әти канаты астында үссен иде. Һәр бала әтисенең җылы, ягымлы карашын тоеп, таләпчән ныклы сүзен ишетеп, дус, тату гаиләнең терәге әти икәнлеген сизеп яшәсен иде. Бәйрәм белән зурлап Морт мәктәбенең Туган тел түгәрәгенә йөрүче укучыларыбыз үзләренең хикәяләре, шигырьләрен яздылар.

Яраткан әтием

Әтием, Шайгаллямов Рамил Габделбәр улы, Алабуга районы Морт авылында туган. Мәктәптә урта белем алганнан соң, Алабуга шәһәренең 79нчы һөнәри белем бирү уку йортында шофёр һөнәрен үзләштерә.

1987 елның ноябрь аенда армия хезмәтенә алына. 1989 елның декаберендә, ике ел хәрби хезмәтен төгәлләп, әти туган авылына кайта. Бергә хезмәт иткән якташлар белән бүгенге көнгә хәтле элемтә өзелми.

Әтием мәктәптә укыган дәвердә үк бик тырыш һәм көчле спортсмен була. Мәктәп, район, республика ярышларында чаңгы, җиңел атлетика, баскетбол, волейбол, туризм буенча призлы урыннар яулый. Әти хәзер дә баһадир гәүдәле. Сабан туйларда гер күтәрү, дилбегә тарту һәм башка ярышларда катнашып, алдынгы урыннарны ала.

Мин әтине бик яратам, озак һәм бәхетле яшәвен телим.

Ландыш Шәйгалләмова,

7 сыйныф укучысы

Әтием

«Әти» диеп яздым әле
Яңа яуган ак карга.
Таптамагыз, ярамый бит
«Әти» сүзен таптарга.

Әти дә бит, әни кебек
Бөек сүз, бөек исем.
Әти кызы булып бик күп еллар
Килә минем яшисем.

Әти бит ул кирәк кеше,
Терәк безгә һәрвакыт.
Гел яшь булып калсын иде,
Узмасын иде вакыт.

Әтиле йортта күңелле,
Бу йортта яши бәхет.
Әти кочагында гына
Һәрвакыт җылы, рәхәт.

Әти, әни, балалы йорт —
Дөньяга нур тарата.
Әтиемне бик яратам,
Ул да мине ярата.

Сөмбел Хуҗина,

4 сыйныф укучысы

Безнең бабай

Фәйзелхан бабабыз Морт авылында туып, без укыган мәктәптә укып, шушы авылда тырышып эшли. Колхозны аякка бастыра. Колхоз булгач авыл яши, үсә. Басуларда иген мул уңыш бирә. Терлек саны арта. Техника яңартыла. Эшчеләргә эш урыны булдырыла. Аңа инде җитмеш яшь тулды. Шуңа карамастан ул көн-төн эштә. Карт әбиебез истәлегенә, аның исемен мәңгеләштереп, "Мөкәрәмә чишмәсе"н яңартты. Аның суы бик тәмле. Мәчет янында зур корылма төзетте. Анда егетләр өчен көрәш түгәрәге үткәрелә. Фәйзелхан бабай үзе дә көрәш белән кечкенәдән үк шөгыльләнә. СССРның грек-рим көрәше буенча спорт мастеры була. Татарча көрәш буенча Татарстанның атказанган спорт остасы. Республиканың 3 тапкыр абсолют чемпионы (1979,1981,1982).

2023 елда Татарстан Рәисе Рөстәм Миңнеханов Фәйзелхан бабама орден тапшырды. Ноябрь ахырында Татарстан Республикасының мактау грамотасы белән бүләкләнде.

Без — аның оныклары — бик горурланабыз. Фәйзелхан бабайга сәламәтлек, озак итеп яшәвен телибез.

Озын-озак яшә,
Картайма һич.
Сәламәтлек тели
Сиңа кызларың.
Син булганда, безгә,
Җил дә исмәс.
Шатлыкларга күмелеп
Яшәрбез!

Амелия һәм Тамина Галәутдинова,

4 сыйныф, 3 сыйныф укучылары

Минем капка

Бабай белән сөйләшеп утырабыз шулай.

— Балам, олы кеше булырга ашыкма әле син. Бала чагыңның кадерен бел. Күрәсеңме, капка тора. Шул капканы ачып чыгып, олы юлга аяк басасың икән, туган йортыңнан, тормыш сукмаклары төрле якка атлатса, ул капканы тиз генә ачып керә алмыйсың, — ди бу миңа.

— Ничек инде? — мин әйтәм. Кайтам да ачам,— дим бабайга.

— Юк балам, ачып булмый шул?

Әйе, ишек алдына чыгу белән, күз капкага төште. Гади генә капка. Ул агачтан да, тимердән дә булырга мөмкин. Кечкенә чакта капкадан да, капка астыннан да йөрибез. Шул чакта, менә шушы гади генә капканың, олыгайгач шундый кадерле буласын белмибез. Ачабыз да ябабыз, ябабыз да ачабыз. Шушы туган йортның капкасы, бала чакның капкасы, әти-әни кочагыдай кадерле икәнен, тавышы бишекнеке сыман моңлы икәнен, бик күп истәлекләргә бай икәнен, олыгайгач, чәчләр агаргач кына аңларбыздыр. Минем капка! Шушы гади генә капканы әле бик күп еллар ачарга язсын. Әти-әниебезне, телебезне, гореф-гадәтләрне, илебезне онытмыйк. Аларны саклыйк, бездән соң киләчәк буынга тапшырыйк. Күкләребез аяз, дөньяларыбыз тыныч булсын!

Салават Хуҗин,

7 сыйныф укучысы