Морт авылы егете — «Ника» премиясе номинанты!

Яшь актер «Ника» милли кинематография премиясенә икенче пландагы «Иң яхшы ир-ат роле» номинациясендә тәкъдим ителгән. Номинантлыкка Илназ Гаффанов Татарстан режиссеры Алмаз Нургалиевның «Җылак» фильмындагы роле өчен эләккән.

Белешмә өчен.

"Җылак«— Президентның Мәдәни инициативалар фонды ярдәмендә гамәлгә ашырыла торган «Алтын тәлинкә» Төбәкара кинопремиясе кысаларында узган «Время кино» питчингында (кинопроектны телдән тәкъдир итү) катнашучы нәфис фильм.

Номинантлар арасында, сүз уңаеннан, Россиянең танылган актеры Юрий Борисов та бар. Бу бит, һичшиксез, искиткеч яңалык.

‒ Мин «Ника» номинациясенә эләгүемне үзем дә аңлый алмыйча калдым. Һаман ышанмыйм. Мин бик шат, әлбәттә. Ләкин күбрәк үзем өчен түгел, ә фильм өчен. Бу шундый дәрәҗәле премиягә номинацияләнгән татар телендәге беренче кинодыр, мөгаен. Татарстан кинематографы өчен, аның шундый югары үрләргә күтәрелүе өчен шатмын, — ди Илназ Гаффанов.

Илназ Галиаскар Камал исемендәге Татар дәүләт академия театры актеры Азһәр Шакиров язмышына багышланган «Җылак» фильмында төште. Якташыбыз фильмда яшь Азһәр Шакировны уйнады.

Сәнгать түгәрәкләре белән тыгыз бәйләнештә үткән актив балачагы, яраткан әнисенең киңәшләре, "Ләйлә апа«дан (җирле режиссер Ләйлә Фәрхетдинова) беренче режиссерлык дәресләре — болар барысы да Илназның иҗади шәхес буларак формалашуында зур роль уйнаган.

— Мәктәптә укыганда мин «Алло, без талантлар эзлибез!» бәйгесендә җиңү яуладым. Бу миңа Алабуга мәдәният һәм сәнгать көллиятенә имтиханнарсыз укырга керү хокукы бирде. Мин театр дөньясын сайладым. 4 курс студенты булганда, әнием миңа ватсапка режиссер Алмаз Нургалиевның кастинг үткәрүе, татарча фильм төшерү өчен актерлар сайлавы турында мәгълүмат җибәрде. Әни: «Тырышып кара», — диде. Мин Алмаз абыйны «дусларыма» өстәдем, тик шул гына. Һәм ни гаҗәп: «Син актер Азһәр Шакировка бик охшагансың. Йөз чалымнары да, кашлар да шундый ук», дип язды. Шулай итеп миңа кинода төшәргә тәкъдим килде, — дип уртаклаша Илназ.

«Җылак» — Илназ өчен дебют фильм. Беренче эпизодларның авыр бирелүен искә төшерә. Илназ Азһәр Шакиров белән Камал театрында бер эпизод төшергәндә таныша. Азһәр Шәфикович очрашканда бик дустанә, тыныч иде, дип искә ала ул.

‒ Миңа урманда төнге вакытта төшерүләр истә калды. Кыш иде. Азһәр абый эшләпә кигән, без озак вакыт салкында тордык, икебез дә туңдык. Янәшәдә генә зират булуы истә калды, куркынычрак иде. Кызыклы моментлар да булды. Хәтерлим, 20 минут буш урында басып тордык, безнең янга полиция хезмәткәрләре килде, күрәсең, нәрсәдәндер шикләнгәннәрдер. Ләкин без барысын да аңлаттык, — дип елмаеп сөйли безнең «йолдызлы» якташыбыз.

Шул ук вакытта героебыз үз шәхесенә югары игътибардан ниндидер уңайсызлык та тоя икән.

‒ Әгәр картинаны тагын бер кат төшерсәләр, үз ролемне башкачарак башкарыр идем дип уйлыйм. Минем үземә, дөресен генә әйткәндә, ничек уйнавым ошап бетмәде. Әмма шул ук вакытта, мондый дәрәҗәне тану бик күңелле. Мин бит киң тамашачыга танылган актер Юрий Борисов белән бер исемлектә, — дип сөйли Илназ Гаффанов.

Уңыш белән канатланган Илназ Гаффанов, шулай да күктәге йолдызларга үрелми. Нәзакәтле һәм тыйнак егет ул. Ә иң мөһиме — хезмәт сөючән. Үз эшен бик ярата. 2024 елның декабреннән ул Яр Чаллы татар театры труппасы составына кергән. Хәзерге вакытта «Алтын алка» спектакле премьерасына әзерләнә, анда ул төп рольне — Миңнебай ролен башкарачак.

‒ Барлык кешеләргә, ләкин барыннан да элек яшьтәшләремә, зур акча артыннан кумаска, йөрәк яткан җирдә эшләргә телим. Акча кирәклеге аңлашыла, әмма бәхет аларда түгел. Иң мөһиме, яраткан эшең булырга тиеш. Һәм балаларның үз әти-әниләрен һичшиксез кадерләве мөһим. Алар — безнең тормышыбызда иң мөһим кешеләр, — ди Илназ Гаффанов.