Рөстәм Миңнеханов ТКХ өчен югары бәяләр турында: һәр мөрәҗәгатькә игътибар итәргә кирәк

Күп кенә татарстанлыларга декабрь аенда җылылык өчен югары бәяләр кигән. Хәлне игътибар белән өйрәнергә һәм һәр аерым очракны ачыкларга кирәк. Бу хакта бүгенге шимбә киңәшмәсендә Татарстан Президенты Рөстәм Миңнеханов сөйләде, дип хәбәр итә республика җитәкчесенең матбугат хезмәте.

«Һәр мөрәҗәгатьне игътибар белән тикшерегез, әгәр исәп-хисапта хаталар булса — төзәтергә. Ә иң мөһиме, аңлату эшләре алып барырга кирәк», — диде ул.

Ул декабрь ае салкын булды, шуның аркасында җылылык куллану артты, дип искә төшерде.

«Татэнерго» АҖ генераль директоры Рәүзил Хаҗиев оешманың кайнар линиясен ачу турында хәбәр итте, анда гражданнар җылылык өчен счетлар буенча мөрәҗәгать итә алалар.

Моңа кадәр ТР Төзелеш, архитектура һәм торак-коммуналь хуҗалык министрлыгында ТКХ өчен исәптәге җылылыкка бәя үзгәрү салкыннар килү белән бәйле дип сөйләделәр.

Исегезгә төшерәбез, Татарстанның берничә шәһәрендә яшәүчеләр җылылык өчен декабрь счетларының артуына зарланды. Әйтик, Казанда яшәүче бер хатын-кыз социаль челтәрләрдә зур булмаган ике бүлмәле фатир өчен 31,5 мең сум акча килүен зарланган. Кайбер түбәнкамалылар социаль челтәрләргә «космик» исәпләүләре белән квитанция фотосурәтләрен куйган, Чаллыда торак-коммуналь хезмәтләр өчен счет-фактуралар алганнан соң, шәһәрлеләр төркемнәргә берләшә башлаган, ә Әлмәттә шикаятьләрдән соң кайнар линия эшли башлаган.