Шәһәребездә Җиңү көненә әзерлек башланды

3 майдан башлап шәһәрдә көн саен диярлек Җиңүнең 76 еллыгына багышланган чаралар уздыру планлаштырыла. Машиналарны хәрби тематикага иң яхшы бизәү буенча «Җиңүне каршылап» дип аталган муниципаль конкурс игълан ителде инде.
7 майда сәгать 11.00дә Советлар Союзы Герое Спирьков Семен Петровичның мемориаль тактасын ачу тантанасы була, 8 майда авыл җирлекләрендә тантаналы чаралар үткәреләчәк, шул ук көнне «Йөрәктән йөрәккә» дип аталган акция оештыру планлаштырыла. Аның кысаларында ветераннарны махсус агитбригада котлаячак.
Төп чаралар 9 майда узачак. Бәйрәм сәгать 9.00дә Хәтер мемориалына һәм тыл хезмәтчәннәренә куелган стелага чәчәкләр салудан башланачак. Шуннан соң сәгать 11.00дә стадионда тантаналы чара оештырыла. Тантананы, гадәттәгечә, бәйрәм парады ачып җибәрә, аннары «Җиңү кайтавазы» дип аталган театральләштерелгән тамаша булачак, ул 12 сәгать 30 минутта тәмамлана. Алга таба бәйрәм Алабуга мәдәният һәм сәнгать көллияте әзерләгән концерт программасы белән дәвам итәчәк. Шулай ук бу көнне 13 сәгать 30 минутта стадионның төп экранында хәрби фильмнар трансляциясе оештыру каралган.
Бәйрәм көнендә стадионда хәрби техника күргәзмәсе, хәрби чор инсталляциясе, мастер-класслар оештырылачак, солдат боткасын татып карарга мөмкин булачак.
Сәгать 18.00дә кичке программа башлана. Аны шулай ук «Яшьләр» стадионында уздыру планлаштырыла. Биредә «Җиңү язы» 3нче шәһәр хор музыкасы фестиваленең гала-концерты, «Союз» төркеменең концерт программасы булачак.
20 сәгать 45 минутта «Хәтер шәме» акциясе старт ала. Җиңү бәйрәме салют белән сәгать 21.00дә тәмамланачак.
Бүгенге көндә Алабуга районында барлыгы 18 сугыш ветераны, 361 тыл хезмәтчәне һәм сугыш чоры балалары категориясенә керүче 3 мең 44 кеше яши. Гыйнвар-февраль айларында ведомствоара комиссия ветераннарның социаль-көнкүреш шартларын тикшерде. Аларның үтенече буенча өч ветеранга көнкүреш техникасы сатып алыначак, федераль социаль иминият фонды тугыз ветеранга тернәкләндерү чаралары, дүртесенә санатор-курорт юлламасы бирәчәк.
Һәр ветеран һәм әлеге категориягә керүчеләргә котлау открыткасы һәм азык-төлек җыелмасы, ә Бөек Ватан сугышы ветераннары тагын бишәр мең сум алачак.