Табиб-нарколог суррогат хәмернең куркынычы турында кисәтте

Этил спирты белән агуланган очракта, 1кг гәүдә массасына 8 г. чиста спирт үлемгә китерергә мөмкин. Ә ялган алкоголь белән агулану өчен аннан да кимрәк доза кирәк, чөнки зарарлы катнашмаларның, сивуш майларының токсик йогынтысы өстәлә. Алкоголь организмга, беренче чиратта, кан тамырлары, йөрәк, бавыр, ашказаны асты бизе, бөер һәм бигрәк тә үзәк нерв системасына көчле йогынты ясый. Алкоголь белән кискен агуланган кеше йоклап китә, аннары бу йокы аңсыз халәткә күчә. Кеше косарга, яткан урынында кече йомышын башкарырга мөмкин. Сулыш алуы тигез булмый. Сулыш үзәге параличы барлыкка килсә, кеше үлә.

— Алкоголь белән агулануның авыр дәрәҗәсе "алкоголь продуктлары"ның химик составы дозасына бәйле. Ул үлемгә китерергә мөмкин булган чиккә кадәр җитә ала. Гадәттә мондый агуланулар 20 яшькә кадәрге яшүсмерләрдә һәм 60-70 яшьтән соң өлкән яшьтәге кешеләрдә күзәтелә. Спиртлы эчемлекнең сыйфатына карап, алкоголь ингредиентлары бавыр белән чистартыла, бавыр һәм бөер аша бүленеп чыга. Шуңа күрә еш кына бавыр һәм бөерләрнең бер үк вакытта зарарлануы күзәтелә, — дип сөйли Алабуга үзәк район хастаханәсе табиб-наркологы Вячеслав Голубев.

Төрле катнашмалар (гидролизлы спирт, денатурат, одеколон һәм лосьоннар, БФ клейлары, политура, морилка) булганлыктан, суррогат белән агулану аеруча авыр агулануга керә. Метил спирты, этиленгликоль — иң куркыныч суррогатлар. Шуның нәтиҗәсендә суррогатлар кабул иткәннән соң авыруларның хәле катлаулана: аларда токсик гепатит, бавыр циррозы, кардиомиодистрофия, энцефалопатия, күрү бозылу, хәтта сукыраю булырга мөмкин. Кеше организмына эләккәч, алар сәламәтлек өчен авыр, еш кына үлемгә китерә торган интоксикацияне китереп чыгара. 

Авыр дәрәҗәдәге алкоголь интоксикациясе, алкоголь комасы, суррогатлар белән агулану хәлендә булган авырулар интенсив терапиягә мохтаҗ. Шуңа күрә алкоголь һәм аның суррогатлары белән агуланганда медицина ярдәме сорап медицина учреждениеләренә мөрәҗәгать итәргә кирәк.