Танылган Россия теннисчысы китап тәкъдир итте һәм Алабуганың керткән өлешен билгеләп үтте

Китапта Мәскәү һәм Алабугадагы зур теннис мәктәпләрендә балалар тренеры сыйфатында халыкара турнирларда чыгыш ясау тәҗрибәсенә нигезләнгән гамәли киңәшләр җыелган. Чарада Алабуга районы башкарма комитеты җитәкчесенең социаль үсеш буенча урынбасары Елена Мерзон катнашты. Татарстаннан килгән кунакны тәкъдим итеп, Надежда Петрова Алабуга җитәкчелегенең һәм шәхсән Алабуга районы башлыгының теннис үсешенә зур ярдәм күрсәтүен билгеләп үтте.

Исегезгә төшерәбез, Мәктәп Алабугада узган елның октябрендә Рөстәм Нуриев инициативасы белән ачылган иде. 2024 елның июнендә Петербург халыкара икътисади форум вакытында Алабуга районында зур теннисны үстерү һәм мәктәп филиалын булдыру өлкәсендә хезмәттәшлек итү турында өч яклы килешү имзаланды. Документка Рөстәм Нуриев, ТР Спорт министры Владимир Леонов һәм дөньяның элеккеге өченче ракеткасы, Лондондагы Олимпия уеннарының бронза призеры Надежда Петрова кул куйды.

Китапны тәкъдир итү уңаеннан матбугат конференциясендә Россия Теннис федерациясе президенты Шамил Тарпищев, танылган тренер, атказанган спорт мастеры Дмитрий Турсунов, Надежданың әтисе, РСФСРның атказанган тренеры Виктор Петров һәм спортчының кызы Виктория, Надежда Петрованың хезмәттәшләре катнашты.

Танылган спортчы Россиядә балалар теннисын үстерү — аның эшчәнлегенең өстенлекле максатларының берсе, дип күп тапкырлар билгеләп үтте.

Үзенең мәктәбе кысаларында ул Мәскәү һәм Алабуга яшь спортчылары белән эшли. Күбрәк балаларга сыйфатлы дәресләр бирү мөмкинлеге тудыру өчен Надежда филиаллар санын арттырырга планлаштыра. Алабугада ачылган филиал — Мәскәүдән читтә беренче, анда хәзер 100гә якын бала шөгыльләнә. Тәҗрибә шактый уңышлы булып чыкты, бу башка төбәкләрдә мәктәпләр челтәре ачу турында уйларга мөмкинлек бирә.

− Әлбәттә, мондый дәреслек тренерлар составы өчен бик кирәк. Анда баланы спортка әзерләү кагыйдәләре, шул ук вакытта аның эмоциональ сәламәтлеген саклап калу турында мәгълүмат бирелә. Хәтта бала бөек спортчы булмаса да, аны спортка, сәламәт яшәү рәвешенә җәлеп итүнең мөһимлеге турында сөйләнә. Петрованың методикасы нәкъ менә шунда һәм Алабугада аның теләкләрен һәм тәкъдимнәрен исәпкә алып сайланган тренерлар составы да аны үти, — ди Елена Мерзон.

Сүз уңаеннан, Шамил Тарпищев китапны тәкъдир иткәндә Надежда Петровага мөрәҗәгать итеп: «Надежда, син Татарстанда тамыр җибәреп дөрес эшләдең», — диде. Ул тренерлар, балаларның ата-аналары белән шәхсән аралашу, дәресләр өчен тудырылган шартларны күрү өчен Алабуга мәктәбенә барырга теләк белдерде.

− Без район башлыгыннан зур теннис өчен ачык мәйданчыклар төзи башлау буенча йөкләмәләр алдык инде һәм беренче икесе бу җәйге сезонда ачылачак. Бу безгә мәктәпара турнирлар уздыру мөмкинлеге бирәчәк, ягъни безгә Мәскәү мәктәбе укучылары килә алачак, Алабуга мәктәбе укучылары Мәскәүгә йөри алачак. Безгә зур булмаган шәһәрдә дә шундый яхшы шартлар тудырылырга мөмкинлеген күрсәтү мөһим. Моны алабугалылар гына түгел, якындагы эре шәһәрләрдә яшәүчеләр дә бәяләде. Алабугага зур теннис белән шөгыльләнергә башка районнардан да киләләр, — ди Елена Мерзон.

Шунысын да билгеләп үтәргә кирәк, хәзер зур тенниска иң яшь алабугалыларны җәлеп итәләр − Алабуганың ике балалар бакчасында гомуми физик әзерлек төркемнәре булдырылган. Алардан танылган теннисчылар үсәрме, вакыт күрсәтер, әмма мондый караш аларны хәзер дә, киләчәктә дә спортка битараф калдырмаячак.