Татарстанда Covid-19 белән зарарлануның 23 яңа очрагы расланган

Татарстанда коронавирус инфекциясе йоктыруның 23 яңа очрагы расланган. Бу хакта ТР Президенты матбугат хезмәте җитәкчесе Лилия Галимова хәбәр итте, диелә “Татар-информ” мәгълүмат агентлыгында.

“Биш кеше хастаханәгә салынды, унсигез кеше өйдә дәвалана”, – диде Лилия Галимова.

Аның сүзләренчә, коронавирус инфекциясе йоктыру 18 яшькә кадәр 2 кешедә, 18дән 30га кадәр – 4, 30дан 50гә кадәр – 10, 50дән 60ка кадәр – 3, 60тан 70кә кадәр – 3, 70тән 80 яшькә кадәр 1 кешедә ачыкланган.

"Коронавирусның сигез очрагы читтән кертелгән, тагын унбиш татарстанлы зарарланган кешеләр белән якын элемтәдә торган", – дип өстәде Лилия Галимова.

23 авыручының 13е – Казанда, дүртесе Яр Чаллыда ачыкланган. Питрәч районында – бер, Биектау районында биш очрак теркәлгән.